Ministria e Punëve të Brendshme ka reaguar përmes një postimi në Facebook për deklaratat e ish deputetit Daut Haradinaj në emisionin “Debat Plus”, në TV Dukagjini duke i cilësuar ato të pasakta në lidhje me dy persona nga komuniteti serb për të cilët ka pretenduar se kjo ministri ua ka dhënë shtetësinë e Republikës së Kosovës.

Sipas Ministrisë së Punëve të Brendshme, Milovan Bojoviq dhe Suzana Rankoviq figurojnë në regjistrat civilë të Kosovës prej vitesh.

Sipas njoftimit të dy këta persona janë regjistruar në regjistrat përkatës në vitet 2001 dhe 2007.

Ky institucion përmes këtij reagimi ka thënë se regjistrimi i shtetësisë së personave në fjalë nuk ka lidhje me Ligjin e ri për Shtetësinë dhe as me procesin aktual të regjistrimit të fakteve të gjendjes civile.

“Sipas të dhënave zyrtare, Milovan Bojoviq është regjistruar për herë të parë në vitin 2007 dhe ka qenë posedues i dokumenteve identifikuese të UNMIK-ut. Letërnjoftimin e Republikës së Kosovës e ka marrë në vitin 2011”, thuhet në njoftimin e MPB-së.

MPB-ja bëri të ditur se Bojoviq ka qenë i arrestuar nga Policia e Kosovës më 8 prill 2016.

Sipas këtij njoftimi, fillimisht ndaj tij i ishte caktuar masa e paraburgimit, mirëpo më pas Gjykata e Apelit kishte vendosur ndërprerjen e kësaj mase duke mundësuar lirimin e tij.

Pas lirimit sipas MPB-së, ai ishte larguar nga territori i Kosovës.

“Sa i përket personit të dytë, Suzana Ranković, MPB-ja sqaron se ajo është qytetare e Republikës së Kosovës dhe nuk është vajza apo mbesa e Aleksandër Rankovićit, siç është pretenduar në deklaratën e z. Haradinaj. Kjo qytetare ka poseduar letërnjoftim të UNMIK-ut që nga viti 2001, të cilin e ka konvertuar në letërnjoftim të Republikës së Kosovës në vitin 2015”, shkruhet në njoftim.

MPB-ja u ka bërë thirrje të gjithë akterëve publikë dhe politikë që para se të bëjnë deklarime publike të verifikojnë faktet dhe të shmangin përhapjen e informatave të pasakta.

Përndryshe, Haradinaj ka publikuar Suzana Rankoviq, duke thënë se asnjëherë nuk ka qen banor e Gjakovës.

Ai ka thënë se është rëndë se si gjenerali serb Milovan Bojoviq ka marrë letërnjoftimin e Kosovës dhe përfitues i skenave sociale.

“Ta ka pru çikën e Rankoviçit në Gjakovë”, Daut Haradinaj.