Një mosmarrëveshje ligjore me financuesit e “Top Gun: Maverick” ka vendosur në qendër të vëmendjes një oligark kontrovers rus.

Lidhjet e supozuara financiare të një kompanie prodhimi filmash me Dmitry Rybolovlev dhe pushtimi rus i Ukrainës po ngrenë pikëpyetje rreth financimit të saj.

Dy vjet më parë, kur pandemia e zhyti industrinë e filmit në një nga periudhat e saj më të errëta, duke rrëzuar një pjesë të konsiderueshme të të ardhurave të Hollivudit dhe studiot përpiqeshin të gjenin alternativa që do t’i lejonin ata të publikonin filmat e tyre dhe të rikuperonin investimet e tyre ndërsa kërkonin opsione të reja financimi, “New Republic Pictures” i përfaqësuar nga themeluesi dhe shefi ekzekutiv i saj, Brian Oliver nënshkroi një marrëveshje me vlerë mbi 200 milionë dollarë me “Paramount Pictures” për të financuar deri në një të katërtën e buxheteve të 10 filmave, duke përfshirë “Top Gun: Maverick”, në këmbim të një pjese të fitimeve ose humbjeve nga filmat.

Marrëveshja e “New Republic Pictures” ofronte një rrugë shpëtimi, zbutjen e rreziqeve të “Paramount Pictures” ndërsa financonte filmat e pritur me padurim si “Coming 2 America” dhe vazhdimet “Mission: Impossible”.

Por tani, lidhjet e supozuara financiare të kompanisë së prodhimit të Los Anxhelosit me oligarkun rus Dmitry Rybolovlev dhe pushtimi rus i Ukrainës janë në qendër të një mosmarrëveshjeje ligjore që ka ngritur pikëpyetje rreth financimit të “New Republic Pictures”.

Bradley Fischer, ish-presidenti i “New Republic Pictures” ngriti një padi në Gjykatën e Lartë të Los Anxhelosit të enjten e kaluar për shkelje të kontratës, duke pretenduar se ndërsa ai po negocionte një zgjatje dyvjeçare të kontratës së tij, “New Republic Pictures” ndryshoi kursin dhe propozoi kushte të reja, më pak të favorshme të marrëveshjes.

“Kjo ndodhi pasi Rybolovlev i largoi asetet e tij nga sipërmarrja pasi Rusia pushtoi Ukrainën dhe qeveritë perëndimore filluan të vendosnin sanksione ndaj rusëve të pasur”, tha ai.

Rybolovlev dhe përfaqësuesit e tij nuk ishin menjëherë të disponueshëm për të dhënë një deklaratë.

Fischer pretendon se pas refuzimit të kushteve të reja, në korrik 2022, ai i detyrohet mbi 15 milionë dollarë.

Përfaqësuesit e “New Republic Pictures” dhe Brian Oliver nuk kanë dhënë asnjë koment.

Ndërsa thelbi i padisë është mosmarrëveshja e një kontrate, ajo ofron një vështrim në botën e errët të financimit të filmit. Sipas padisë miliarderi rus, Rybolovlev ka luajtur një rol kryesor në financimin e “Top Gun: Maverick” dhe filmave të tjerë të mëdhenj të “Paramount Pictures”. /ATSH