Sulmuesi i ri i Milanit, Alvaro Morata ka shpjeguar arsyen pse u nda nga gruaja e tij Alice Campello duke thënë se ajo nuk donte të transferohej në Itali. Dyshja njoftuan papritur ndarjen javën e kaluar me deklarata të veçanta në Instagram.

“Jam i shkatërruar, por betohem që nuk e kam tradhtuar kurrë. Ajo është gruaja më e rëndësishme e jetës sime”, ka shpjeguar Morata në intervistën e tij të fundit, cituar nga “Gazzetta”.

“Alice donte të qëndronte në Spanjë dhe nuk donte të lëvizte më. Pavarësisht pikëpamjeve të ndryshme, ne ende kemi një raport të shkëlqyer për mirëqenien e katër fëmijëve tanë. Nuk do të ketë asnjë mendim të dytë”, shtoi Moratta, përcjellë KosovaPress.

Morata, një ish-sulmues i Juventusit, iu bashkua Milanit nga Atletico Madrid për 13 milionë euro këtë verë. Spanjolli bëri debutimin e tij në Serie A me kuqezinjtë në San Siro të shtunën dhe kontribuoi në barazimin 2-2 kundër Torinos falë një goli të vonshëm.

Morata dhe ish-gruaja e tij Alice Campello e njihnin njëri-tjetrin gjatë periudhës së parë të Moratas në Juventus në 2014-15 dhe u martuan në qershor 2017.

Sulmuesi spanjoll me përvojë u rikthye në Torino në vitin 2020 duke qëndruar në klub edhe për dy vite të tjera.