Bullgaria më në fund ka një qeveri që po i kushton vëmendje ndryshimeve klimatike, jo vetëm sepse një zëvendëskryeministër është vënë në krye të sektorit, por sepse të gjitha veprimet e tij janë të kordinuara. Ky vend është gjithashtu i angazhuar në dialog edhe më të ngushtë me partnerët e tij të Bashkimit Evropian”, tha zëvendëskryeministri dhe ministri i Mjedisit dhe Ujërave, Borislav Sandov. Ai po fliste në konferencën e së martës me titull "Axhenda e Gjelbër: Ngasje pa emetime gazrash për të Ardhmen e Qëndrueshme".

Ndryshimet klimatike, humbja e biodiversitetit dhe ndotja nga mbeturinat janë tre aspektet mbi të cilat duhet fokusuar për të reduktuar emetimet, vuri në dukje Sandov, duke shtuar se Bullgaria ka ende një ekonomi shumë intensive të karbonit.

Ministria ka luajtur një rol të rëndësishëm në ngritjen e 10,000 stacioneve të reja të karikimit për të rritur lëvizshmërinë elektrike, si dhe mbjelljen e 100 milionë pemëve. Sandov kujtoi se Bullgaria do të aplikojë për të organizuar Konferencën e OKB-së për Ndryshimet Klimatike COP 29 në 2024.

Bullgaria ka një rrugë të gjatë për të bërë deri tek ekonomia rrethore, tha themeluesi i platformës civile MOVE.BG, Sasha Bezuhanova, duke iu drejtuar forumit. Vetëm 2.8 për qind e materialeve të përdorura (në prodhim) përdoren sërish, shtoi ajo, duke theksuar se tranzicioni i gjelbër është tejkaluar nga kriza e Covid-it dhe lufta në Ukrainë.

Mendim të kundërt dha Cvetan Kyulanov, ushtrues detyre i Përfaqësisë së KE-së në Bullgari. Këto kriza do të përshpejtojnë tranzicionin, sepse kjo është filozofia që Komisioni ka vendosur të ndjekë, e cila do ta bëjë Evropën një vend më të mirë për të jetuar, tha ai. Planet e rimëkëmbjes dhe qëndrueshmërisë janë mënyra më e drejtpërdrejtë për të punuar në atë drejtim. Bullgaria ka synime ambicioze të gjelbra, theksoi Kyulanov. Shpresojmë që në momentin që ai të miratohet, vendi do të fillojë të punojë aktivisht në zbatimin e tij.

Ripërtritja e ekosistemeve dhe pyjeve është ndër vendimet për të reduktuar ndikimin e ndryshimeve klimatike, tha nga ana e saj drejtoresha e Zyrës së Politikave Evropiane të WWF, Ester Asin Martinez. Ripërtritja e natyrës mbështet zhvillimin e ekonomisë lokale, punësimin, krijon një mjedis të shëndetshëm dhe do të reduktojë zjarret dhe thatësirën.

Vendet evropiane tashmë po ndjejnë përfitimet e programit NATURA 2000. Me 200 deri në 300 miliardë euro të ndara çdo vit për këtë qëllim, rreth 4 milionë vende pune varen drejtpërdrejt nga mirëmbajtja e ekosistemeve të shëndetshme, shtoi Martinez.

Ministri rumun i Mjedisit, Ujërave dhe Pyjeve, Barna Tànczos, tha se vendi i tij ka një program që inkurajon blerjen e makinave elektrike, si dhe një numër në rritje stacionesh karikimi. Fokus tjetër janë  amvisëritë dhe instalimi fotovoltaik, nga të cilat pritet të përfitojnë 50 mijë familje, shtoi ai.

Rumania ka ambicie për të rritur diversifikimin e energjisë, tha Tànczos, pasi një pjesë e madhe e energjisë elektrike të saj vjen nga hidrocentralet. Ajo po investon gjithashtu në dekarbonizimin duke futur teknologjitë e gjelbra.

Ministri rumun i Mjedisit përgëzoi Bullgarinë për aplikimin për të organizuar Konferencën COP 24 në 2024.

Konferenca organizohet nga koalicioni Green Restart (MOVE.BG, WWF-Bulgaria, Greenpeace-Bulgaria dhe Instituti për Ekonominë Rrethore) në partneritet me Zyrën Përfaqësuese të Komisionit Evropian në Bullgari./KosovaPress-BTA/