Legjenda e futbollit francez, Michel Platini, ka rihapur një betejë të ashpër ligjore duke dorëzuar një padi penale në Francë kundër presidentit aktual të FIFA-s, Gianni Infantino, dhe pesë zyrtarëve të tjerë të lartë zviceranë të drejtësisë dhe futbollit.

Platini, i cili vitin e kaluar u shpall plotësisht i pafajshëm nga gjykata zvicerane pas një procesi të gjatë, pretendon se ndaj tij ka pasur një konspiracion me akuza të rreme dhe ushtrim ndikimi për t’ia pamundur marrjen e timonit të FIFA-s një dekadë më parë.

Përveç padisë penale, avokatët e tij do të ngrenë edhe një padi civile për të kërkuar dëmshpërblim financiar nga shtëpia botërore e futbollit, raporton ESPN.

Sipas deklaratës zyrtare të lëshuar nga zëdhënësi i Platinisë, veprimet ligjore synojnë të zbardhin prapaskenat e vitit 2015:

"Platini pretendon një konspiracion të akuzave të rreme dhe shitjes së ndikimit (influence peddling) për ta parandaluar atë që të bëhej president i FIFA-s një dekadë më parë."

Sipas ESPN Ky zhvillim vjen në një moment mjaft specifik, vetëm tre ditë përpara se Infantino të hapë zyrtarisht Kampionatin Botëror në Amerikën e Veriut.

Historia e Prapaskenave:

Në vitin 2015, Platini shihej si pasardhësi i sigurt i Sepp Blatter në krye të FIFA-s, pas skandaleve të korrupsionit që tronditën organizatën.

Megjithatë, një hetim zviceran mbi një pagesë prej 2 milionë frangash zvicerane ($2.5 milionë dollarë) që Blatter i kishte bërë Platinisë, i përjashtoi të dy nga futbolli. Ky dënim i hapi rrugën Infantinos – i cili në atë kohë shërbente si Sekretar i Përgjithshëm i UEFA-s nën drejtimin e Platinisë – që të kandidonte dhe të zgjidhej si kreu i ri i FIFA-s në vitin 2016.

Në mesin e pesë personave të tjerë të shënjestruar nga kjo padi janë edhe ish-Prokurori i Përgjithshëm i Zvicrës në vitin 2015, Michael Lauber, si dhe ish-drejtori ligjor i FIFA-s në atë kohë, Marco Villiger.

Të dy, Platini dhe Blatter, u shpallën të pafajshëm për akuzat e mashtrimit ndaj FIFA-s gjatë gjyqit të parë në Zvicer në vitin 2022, si dhe vitin e kaluar pas ankesës së bërë nga zyra e prokurorisë federale. Deri më tani, FIFA nuk ka dhënë një koment zyrtar lidhur me paditë e fundit të Platinisë.

KosovaPress