Në margjinat e Forumit Diplomatik të Antalisë, kryetari i Partisë Demokratike të Kosovës, Memli Krasniqi, ka takuar të dërguarin e posaçëm të BE-së për dialogun ndërmjet Kosovës dhe Serbisë, Miroslav Lajçak, me të cilin ka biseduar për zhvillimet politike në Kosovë.

Krasniqi me këtë rast ka shprehur shqetësimin për masat ndëshkuese të BE-së ndaj Kosovës dhe kërkoi nga diplomati sllovak që të luajë një rol ndihmues për heqjen e tyre.

“Bashkë diskutuam për zhvillimet politike në Kosovë. Emisarit Lajçak i shpreha shqetësimin për masat ndëshkuese të BE-së ndaj Kosovës dhe kërkova nga ai që të luaj rol ndihmues për heqjen e tyre. Orientimi euro-atlantik i qytetarëve dhe shtetit tonë është i paalternativë dhe i pakthyeshëm.

BE ka vendosur në korrik të vitit të kaluar masa ndëshkuese ndaj Kosovës për  shkak të mos përmbushjes së kushteve të BE-së dhe SHBA-së për shtensionimin e situatës në veri.

Masat, për të cilat Qeveria e Kosovës ishte njoftuar më 28 qershor 2023, përfshijnë suspendimin e përkohshëm të punës së trupave të krijuara në bazë të Marrëveshjes së Stabilizim-Asociimit (MSA), mos ftesën e Kosovës në takime të nivelit të lartë dhe suspendimin e vizitave bilaterale, përveç atyre që fokusohen në adresimin e krizës në veri në kuadër të dialogut, ndaljen e programimit të fondeve për Kosovën nga Instrumentet e Para-Anëtarësimit IPA 2024.

BE tha se heqja e masave varen nga rrjedhja e situatës në terren dhe dialogu me Serbinë. Prishtina zyrtare ka reduktuar praninë policore përreth ndërtesave komunale në veri dhe ka hartuar një udhëzim administrativ që mundëson largimin e kryetarëve të komunave përmes një peticioni, por këto veprime nga Brukseli  janë vlerësuar “në drejtim të duhur, por të pamjaftueshme”.