Gjeorgjia dhe Çekia kanë përfunduar ndeshjen e xhiros së dytë të grupit F në Hamburg.

Të dyja kombëtaret siguruan pikët e para në EURO2024, duke luajtur baras 1:1.

Gjeorgjia erdhi në epërsi nga penalltia në minutën e katërt të kohës shtesë të pjesës së parë me golin e Georges Mikautadze.

Kombëtarja e Çekisë barazoi shifrat në pjesën e dytë përmes sulmuesit Patrik Schik, i cili u tregua i saktë nga afërsia në minutën e 59-të.

Turqia dhe Portugalia, të cilat takohen sot nga ora 18:00, prijnë në grup me nga tri pikë. Çekia e Gjeorgjia kanë nga një pikë.

Çekia ndeshjen e radhës do ta luajë kundër Turqisë më 26 qershor. Në të njëjtën ditë takohen Gjeorgjia me Portugalinë. Këto do të jenë ndeshjet vendimtare për të përcaktuar dy ekipet e para nga grupi që do të sigurojnë fazën e radhës të evropianit.