Emisari i Bashkimit Evropian për dialogun Kosovë-Serbi, Miroslav Lajçak, është takuar me senatorët amerikanë, Chris Murphy dhe Chris Van Hollen, me të cilët ka biseduar për situatën në veri të Kosovës.

Lajçak ka shkruar se në këtë takim është theksuar nevoja për de-përshkallëzim të situatës dhe rikthim në dialog.

“Patëm një takim të rëndësishëm me senatorët Chris Van Hollen dhe Chris Muprhy, të cilët ndjekin nga afër zhvillimet në Ballkanin Perëndimor. Ne ndamë të njëjtin vlerësim për situatën dhe ramë dakord për nevojën e de-përshkallëzimit dhe rikthimit në dialog dhe normalizim”, ka shkruar Lajçak në Twitter.

https://twitter.com/MiroslavLajcak/status/1671599456716742660

Situata në veri të Kosovës është tensionuar prej 26 majit kur kryetarët e zgjedhur u detyruan të shkojnë në vendet e tyre të punës nën asistimin e Policisë së Kosovës.

Para ndërtesave komunale po qëndrojnë protestues serbë të cilët po kundërshtojnë kryetarët shqiptarë.

Gjatë kësaj kohe, protestuesit në veri, në mesin e tyre edhe të tillë me maska, kanë sulmuar pjesëtarë të Policisë së Kosovës, KFOR-it si dhe gazetarë të cilët po raportojnë nga pjesa veriore e vendit.

Autoritetet e Kosovës kanë arrestuar disa prej sulmuesve, në mesin e tyre edhe organizatorin e sulmeve ndaj KFOR-it, Millan Millenkoviq-Llune.

Ndërsa forcat serbe kanë rrëmbyer tre policë kufitar, brenda territorit të Kosovës, të cilët po vazhdon t’i mbajë në Serbi.