Emisari evropian për dialogun Miroslav Lajçak ka folur mbi përgatitjet për takimin e radhës ndërmjet kryenegociatorëve të Kosovës dhe Serbisë në procesin e dialogut më 24 tetor në Bruksel

Ai në një postim në Facebook ka folur rreth takimit të fundit që kishte në Vjenë me zëvendëskryeministrin Besnik Bislimi, rreth hapave të nevojshëm për zbatimin e marrëveshjes për rrugën drejt normalizimit.

“Është koha për të filluar zbatimin me zell”, ka shkruar diplomati sllovak në postim.

Lajçak ka folur edhe mbi pjesëmarrjen e tij në përvjetorin e Samitit të Procesit të Berlinit në Berlin me ftesë të kancelarit Olaf Scholz, duke thënë se kjo ishte një kujtesë e mirë se si ka evoluar qëndrimi i BE-së për zgjerimin gjatë dekadës së fundit.

“Sot, BE-ja është më e përgatitur se kurrë, por suksesi varet po aq nga angazhimi i Ballkanit Perëndimor për të trajtuar reformat e ashpra”, ka shkruar Lajçak, i cili takimet kësaj jave i ka përmbyllur në Londër me emisarin britanik për Ballkanin Perëndimor, Stuart Peach, zyrtarë të FCDO dhe ekspertë për Ballkanin Perëndimor.