Sekretari amerikan i mbrojtjes, Lloyd Austin, ka thënë se presidenti rus, Vladimir Putin nuk është në gjendje t'i tregojë Ukrainës se çfarë duhet të bëjë për të arritur paqen.

Putin sot tha se Rusia do të ishte gati për bisedime paqeje "nesër" nëse Ukraina do të pranonte kërkesat e tij.

Ato përfshijnë tërheqjen e menjëhershme të trupave ukrainase nga rajonet Zaporizhzhia, Kherson, Donetsk dhe Luhansk dhe sigurimin se Ukraina do të heqë dorë nga planet e saj për t'u bashkuar me NATO-n.

Austin argumentoi se Putini mund t'i japë fund luftës sot nëse dëshiron dhe i bëri thirrje presidentit rus që të tërheqë trupat e tij nga territori ukrainas.

"Ai nuk është në asnjë pozicion për t'i diktuar Ukrainës se çfarë duhet të bëjnë për të sjellë paqen", u tha Austin gazetarëve në selinë e NATO-s në Bruksel.