Kryeministri i Kosovës, Albin Kurti konfirmoi se nesër në ndërtesa publike do të mbahen seancat konstituive për betimin e kryetarëve të rinj të komunës së Zveçanit, Zubin Potokut dhe Leposaviqit.
Kurti, në fjalën hyrëse të mbledhjes së Qeverisë së Kosovës tha se nuk është normal që tash e 6 muaj këto komuna kanë mbetur pa kryetar, por edhe qytetarët pa shërbime komunale.
“Nesër në ndërtesa publike në këto komuna do të mbahen seancat konstituive dhe betimi i tre kryetarëve të rinj të Zveçanit, Zubin Potokut dhe Leposaviqit. Kanë kaluar mbi 6 muaj prej kur këto katër komuna mbeten pa kryetar, dy prej tyre edhe pa Kuvende, e banorët atje pa shërbime komunale, kjo nuk është normale, veprimet tona kanë në qendër funksionalizimin demokratik të institucioneve shtetërore dhe garantimin e shërbimeve publike për të gjithë qytetarët pa dallim.“, tha ai.
Teksa e përmendi edhe betimin e Erden Atiq si kryetar të Mitrovicës së Veriut, shefi i qeverisë së Kosovës, Albin Kurti u shpreh se Beogradi ndikoi në dalje të ulët të qytetarëveserbë në zgjedhjet e prillit që janë mbajtur në komunat veriore.
Ndërsa, të premten (19 maj) në seancë solemne në objektin e Komunës së Mitrovicës Veriore është betuar si kryetar, Erden Atiq, i cili ka emëruar edhe katër drejtorë komunalë. Vendimi i parë që Atiq ka marrë, ka qenë emërimi i Katarina Agjanqiq nga komuniteti serb si nënkryetare të komunës./B.Ibishi/
