Kurti: Rritja mesatare ekonomike në këto dy vjet ishte rreth 7 për qind
Lexohet për: 2 min.
1 vit më parë
Linku u kopjua
Kryeministri Albin Kurti në mbledhjen e sotme të Qeverisë renditi disa nga sukseset që, sipas tij, e karakterizuan qeverisjen dyvjeçare të tij.
Në dyvjetorin e marrjes së detyrës, Kurti ka thënë se Kosova nën udhëheqjen e tij ka pasur ringjallje ekonomike dhe rikthim të normalitetit.
Kurti tha se rritja mesatare ekonomike në këto dy vjet ka qenë rreth 7 për qind dhe shtim të buxhetit si rezultat i qeverisjes së mirë.
Kryeministri ka përmendur edhe sfidat, pandeminë Covid 19, krizën energjetike dhe luftën në Ukrainë.
“Përkundër vështirësisë të shkaktuar nga pandemia, kriza energjetike dhe pasojat e luftës në Ukrainë, rritja mesatare ekonomike në këto dy vjet ka qenë rreth 7 për qind, që është më e lartë se cdo rritje tjetër mesatare në dy vitet tjera rresht që nga shpallja e pavarësisë. Për dy vjet buxhetit të shtetit i janë shtuar 760 milionë euro, kurse ekonomisë 2.1 miliardë euro. Të gjitha këto pa ndryshime të politikave fiskale, kjo si rezultat i qeverisjes së mirë”, theksoi Kurti.
Në këtë paraqitje, Kurti nuk la pa fajësuar edhe qeveritë e kaluara.
Kurti po ashtu ka thënë se në këto 24 muaj qeverisje, vullneti dhe ambiciet e tyre janë përballur me një trend të rënd e të trashëguar dhe në të njëjtën kohë me sfida./KosovaPress/
