Kosova sa më parë duhet ta marrë statusin e vendit kandidat për anëtarësim në Bashkimin Evropian, tha kryeministri Albin Kurti.
Ai, pas takimit me shefin e Zyrës së BE-së në Kosovë, Aivo Orav, tha se prioritet i qeverisë së sapo zgjedhur të tij është edhe përshpejtimi i agjendës së reformave për integrim në unionin evropian.
“E falënderova ambasadorin Orav, shefin e misionit të Bashkimit Evropian në vendin tonë, për urimin e tij me rastin e konstituimit të Kuvendit të legjislaturës së 10-të dhe për formimin e qeverisë, si edhe për aprovimin e Planit të Rritjes së Bashkimit Evropian, i cili ka vlerë të gjithmbarshme për republikën tonë prej 882.6 milionë eurosh. Nga këto, afro 30 për qind janë grante, ndërkaq mbi 70 për qind janë kredi. Gjithashtu, i përsërita zotimet e Republikës së Kosovës se shteti ynë do të jetë, siç ka qenë përherë, partner i besueshëm dhe serioz i Bashkimit Evropian. Ne konsiderojmë që Bashkimi Evropian është organizata e paqes dhe sigurisë, ku ne dëshirojmë edhe të kontribuojmë, edhe të përfitojmë. Për këtë është e nevojshme që sa më parë të marrim statusin e vendit kandidat dhe pyetësorin nga Komisioni Evropian, që do të na ndihmojë ta përshpejtojmë agjendën e reformave, që padyshim do të jetë prioritet i qeverisë sonë”, tha ai.
Në anën tjetër, ambasadori Orav tha se ndihet i lumtur me formimin e institucioneve në Kosovë, pasi është e rëndësishme për BE-në që të ketë një partner të qëndrueshëm në Kosovë.
“Të gjithë e dimë që vitin e kaluar u testuan limitet e Kushtetutës. U desh ca kohë, por besoj se tani është e mundur që të lëvizim para në drejtimin e duhur; është me rëndësi që nga ana evropiane të kemi një partner, një qeveri të qëndrueshme. Jam gjithashtu i lumtur se marrëveshjet lidhur me Planin e Rritjes u miratuan kaq shpejt në Kuvend dhe tani procesi i zgjerimit të BE-së vazhdon. Shpresoj që me Kosovën të kalojmë faqen tjetër të librit dhe të vazhdojmë për një të ardhme të përbashkët”, shtoi ai. Kurti ka marrë votëbesimin më 11 shkurt në Kuvendin e Kosovës, pas konstituimit të legjislaturës së dhjetë.
