Kryeministri në detyrë Albin Kurti, në Konferencën e Sigurisë në Munih, takoi sot emisarin e ri të BE-së për dialogun Peter Sorensen.

Në këtë takim të parë ndërmjet tyre, kryeministri Kurti uroi Sorensen për pozitën dhe përgjegjësitë e reja, teksa veçoi progresin e Kosovës në katër vjetët e fundit, me theks te rritja ekonomike mesatare prej 6%, raporti i fundit i BE-së për vendin, që evidenton progres në 36 nga 38 fushat e vlerësimit dhe asnjë fushë me regres, pastaj rishpërndarja sociale, sundimi i ligjit, lufta kundër korrupsionit dhe avancimi i të drejtave politike e lirive civile.

Ai tha se Kosova është shembull se si zhvillimi dhe demokracia shkojnë krah për krah.

Sa i përket raporteve me Serbinë, kryeministri theksoi rëndësinë e zbatimit të plotë të Marrëveshjes Bazike të Brukselit të vitit 2023 dhe aneksit të saj.

Në të njëjtën kohë, ai tha se kjo marrëveshje po vazhdon të shkelet e të mos respektohet nga Serbia, e cila gjithashtu refuzon nënshkrimin e saj dhe përmes letrës së ish-kryeministres Ana Bërnabiq, praktikisht Serbia është tërhequr nga marrëveshja.

Për të ecur përpara nevojitet nënshkrimi i marrëveshjes, tërheqja e letrës së ish-kryeministres Bërnabiq dhe dorëzimi i kryeterroristit Milan Radoiçiq, për të cilin tashmë ka aktakuzë 160 faqesh nga Prokuroria e Republikës së Kosovës.

Kryeministri Kurti tha se është absurde që presidenti i Serbisë Aleksandar Vuçiq ia imponon dorëheqjen kryeministrit të Serbisë Millosh Vuçeviq, por nuk e dorëzon kriminelin Milan Radoiçiq, i cili ka marrë përsipër sulmin terrorist në Banjska duke lënë të vrarë një polic të Kosovës.