Kurti: Abdixhiku refuzoi ofertën për bashkëqeverisje, Kosova po shkon drejt zgjedhjeve
1-First
Lexohet për: 3 min.
Dëgjoje me zë...
Kurti: Abdixhiku refuzoi ofertën për bashkëqeverisje, Kosova po shkon drejt zgjedhjeve
Kryetari i Lidhjes Demokratike të Kosovës, Lumir Abdixhiku refuzoi ofertën për bashkëqeverisje, tha kryeministri Albin Kurti. Pas takimit të hënën për zgjedhjen e presidentit, Kurti tha se Abdixhiku refuzoi edhe ofertën e dytë që LDK-ja ta marrë postin e kryetarit të Kuvendit. Rrjedhimisht sipas Kurtit, vendi po shkon drejt zgjedhjeve të reja.
I pyetur se cilat do të jenë përpjekjet e radhës për zgjedhjen e të parit të vendit, derisa kanë mbetur edhe nëntë ditë afat kushtetues, Kurti tha se i ka dërguar një mesazh liderit të PDK-së, Bedri Hamza për takim, por shtoi se oferta për bashkëqeverisje dhe kryetarin e Kuvendit vlente ekskluzivisht për LDK-në.
“Fillimisht ne ofruam që LDK-ja në bashkëqeverisje me Lëvizjen Vetëvendosje dhe partnerët e tjerë që i kemi në mazhorancën prej 66 deputetëve të ketë zëvendëskryeministrin, Ministrinë e Punëve të Jashtme dhe tri ministri të tjera. Unë kam preferuar që zëvendësi i imi të bëhet pikërisht zotëri Abdixhiku dhe në këtë mënyrë të fillojmë një kapitull të ri të bashkëpunimit dhe bashkëveprimit të LDK-së. Ju e dini se i pata shkruar një letër kryetarit Abdixhiku më mirë ta bëjmë tash sesa më vonë koalicionin. Nuk u bë atëherë dhe as tash dhe kjo është për të ardhur keq. Në këtë mënyrë Kosova po shkon drejt zgjedhjeve të reja tërësisht të panevojshme...Ne nuk mund të krijojmë bashkëqeverisje dhe bashkëpunime në kundërshtim me vullnetin e popullit dhe kundërshtim me rezultatin e zgjedhjeve”, tha ai.
Sipas tij, krahas kërkesës për bashkëqeverisje, lideri i LDK-së refuzoi edhe ofertën e dytë që kjo parti ta marrë postin e kryetarit të Kuvendit.
“Nuk është dashur të refuzohet oferta jonë për bashkëqeverisje. Kur është refuzuar oferta jonë për bashkëqeverisje, në shpjegimin që LVV-ja nuk duhet t’i ketë të tri pozitat e larta shtetërore, atëherë ne bëmë një ofertë tjetër për LDK-në. Kjo është që pozita e kryetarit të Kuvendit dhe nënkryetarit të Kuvendit të pësojnë një rokadë. Ashtu që ose nënkryetari i LDK-së ose dikush tjetër që përcaktohet LDK-ja të zë pozitën e kryetarit të Kuvendit, ndërkaq kryetarja aktuale e Kuvendit do të bëhej nënkryetare e Kuvendit, aty ku tash është pozita e LDK-së. LDK-ja do të kryesonte legjislativin, ndërkohë për kandidatin tonë, Gluak Konjufcën ne nuk kemi kërkuar votë për nga LDK-ja. Ata të votojnë si të duan”, tha ai.
I pyetur pse po insistojnë që postin e presidentit ta ketë LVV-ja, Kurti tha se Abdixhiku në asnjërin takim nuk ka prezantuar asnjë emër për president.
Sipas tij, LDK-ja me 15 deputetë nuk beson se ka të drejtë të kërkojë pozitën e presidentit.
Pas dështimit të arritjes së një marrëveshjeje me LDK-në, Kurti tha se i ka dërguar një mesazh kryetarit të PDK-së, Bedri Hamza për takim, por nuk tregoi nëse i ka dërguar ftesë zyrtare.
Kuvendi ka afat deri më 28 prill për ta zgjedhur presidentin, në të kundërtën vendi shkon në zgjedhje të reja.
