Pakënaqësitë brenda Lidhjes Demokratike të Kosovës, po vazhdojnë të dalin në publik. Pas Avdullah Hotit, i cili kërkoi lidership të ri, nga kjo parti kanë dal edhe bisedat e brendshme ku paraqiten ankesa për manipulime gjatë procesit zgjedhor të 9 shkurtit. Krejt kjo është skenë kriminale për ish-shefin e grupit parlamentar të LDK-së, Arben Gashi. Atij i ka reaguar edhe kryetari i kësaj partie, Lumir Abdixhiku. Ndërkohë, personazheve në biseda, Tërmkolli u referohet si “tuxharë sorosianë”.

Në dritën e këtyre zhvillimeve, gazeta Reporteri.net publikoi disa mesazhe të brendshme të LDK-së. Mesazhet, të shkëmbyera në një grup “Viber” të anëtarëve të LDK-së, zbulojnë shqetësime për manipulime gjatë procesit zgjedhor.

Sipas ‘screenshot’-eve të publikuara, ish-shefi i grupit parlamentar të LDK-së, Arben Gashi, akuzon për vjedhje votash dhe kërkon që ky rast të cilësohet si “skemë kriminale”.“Faktet po ulërasin o Kujtim. Ti duhet me u pajtu me shqetësimin, për krimin qe ka ndodhë”, shkroi Arben Gashi.

Kësaj iu përgjigj Shala duke thënë se:“Asnjë manipulim nuk është i tolerueshëm”.“ Për të gjitha”, vazhdonte numri 2 i listës zgjedhore të LDK-së.

“Ato rikulmuan dhe sonte, në sinkron. Janë sulme që për target pështyme kanë, merreni me mend, partinë e vendit të tretë. Ne, sërish, për të satën herë nga vendi i tretë - siç na kujtojnë këta si të parëdësishëm - jemi fajtorët kryesorë për secilën gjë në këtë vend. Në këto sulme të paramenduara e në sinkron, janë bërë bashkë kundërshtarët e rinj e të vjetër të Lidhjes; dhe gjithë ata që ndjejnë se kanë humbur hapin me hapjen e madhe që në LDK ka ndodhë, po ndodhë dhe do të ndodhë. Nga njëra anë, nga njëra palë, na thuhet se jemi të kapur nga bizneset oligarke, prandaj s’kemi nga t’ia mbajmë. Ani pse ja që po ja mbajmë. Për veten dhe gjithë ata mbështetës tanë. Zëri i tyre është i vetmi që sot na drejton. Nga ana tjetër, nga pala tjetër, na thuhet se jemi shërbëtorë të pushtetit, prandaj dhe po i lëmë të qeverisin. Ani pse, nuk shkojmë me ta, s’flasim me ta, s’bashkëpunojmë me ta. E vërteta është e thjeshtë. Krejt e thjeshtë dhe e drejtë. LDK po qëndron për veten; dhe nëpërmjet vetes dhe për Republikën. E sepse po qëndron si e tillë, edhe po sulmohet nga të tjerët. S’janë mësuar të na shohin kështu, nuk e pranojnë kështu. Prandaj janë bashkë si një kundër LDK-së. Sa për informim, temat e brendshme janë diskutuar tashmë në Kryesi. LDK i beson institucioneve tona në çdo drejtim; dhe në këtë drejtim. Ne nuk bëjmë as prokurorinë e as gjyqësinë”, tha ai.

Ish-deputetetja e LDK’së, Melihate Tërmkolli, ka reaguar pas publikimit të komunikimeve të brendshme të LDK’së mes anëtarëve të Kryesisë së kësaj partie, ku flitet për një “skeme të organizuar kriminale” lidhur me votat me postë të mërgatës. Personazheve në këto biseda, Tërmkolli u referohet si “tuxharë sorosianë”, teksa thotë se po e mbajnë peng LDK’në për interesa personale.