Edhe këtë fundjavë qindra qytetarë të Kosovës që po hyjnë në territorin e Shqipërisë po lëvizin lirshëm pa kontrolle në pikat kufitare. Ambasadori i Shqipërisë në Kosovë, Qemal Minxhozi, tha se aplikimi i këtij plani ka dhënë efekte të menjëhershme duke shtuar numrin e personave që zgjedhin të pushojnë në Shqipëri gjatë fundjavës.

Fundjava në pikën kufitare të Morinës në Kukës ka nisur me një fluks të lartë të qytetarëve  të Kosovës dhe mjeteve që kanë hyrë në Shqipëri për pushime në bregdet.

Nga kufiri ambasadori i Shqipërisë në Kosovë, Qemal Minxhozi, e ka cilësuar si lajm të mirë që po gjen zbatim liberalizimi i kufijve gjatë fundjavave,  e që sipas tij  ka dhënë efektet e menjëhershme.

"Prej dy javësh kemi një liberalizim në fundjavë të kufijve dhe kjo ka sjellë rritjen e numrit të njerëzve që lëvizin si nga Shqipëria drejt Kosovës dhe nga Kosova drejt Shqipërisë. E shikoni tani, janë orët e pikut të mëngjesit që zakonisht lëvizjet janë shumë të mëdha dhe nuk ka absolutisht një makinë që pret."

"Nga të dhënat që kemi, vetëm duke liberalizuar këtë lëvizje për këto dy javë, të shtunave dhe të dielave ka një rritje me 15% më tepër sesa ku kishte kontrolle."

Aplikimi për lëvizjen pa kontrolle  në dy anët e kufirit, në fundjavë dhe festa zyrtare do të jetë në zbatim deri 30 shtator./OraNews/