KosovaJob ka bërë bashkë sot mbi 800 pjesëmarrës në edicionin më inovativ të Samitit për Burime Njerëzore “PowerToHR”, duke sjellë një format dinamik, me kombinimin e njohurive mbi njerëzit, teknologjinë dhe marketingun në një ngjarje unike profesionale.

Në këtë event që po organizohet për herë të tretë në Kosovë, morën pjesë kompani globale dhe ekspertë të njohur vendorë duke ndarë përvojat e tyre, për të bërë sa më atraktivë dhe produktivë këtë organizim.

Themeluesi dhe udhëheqësi i KosovaJob dhe HumanPower, Arion Rizaj tha se dy qëllimet kryesore të këtij eventi janë rrjetëzimi, që sipas tij është thelbësor për individët, sidomos burimet njerëzore, dhe hapja e një platforme për të mësuar trendet e fundit që implementohen nga korporatat ndërkombëtare.

“PowerToHr po organizohet për herë të tretë. Ky është viti i tretë që po e bëjmë. Në edicionin e dytë i kemi pasur diku 350 pjesëmarrës, sot i kemi mbi 800 pjesëmarrës, që tregon se çdo vit ka shkuar duke u rritur interesimi sepse njerëzit e kanë parë si një udhërrëfyes të rëndësishëm për tu rrjetëzuar me njëri-tjetrin. Por, për më shumë për të mësuar gjëra të reja prej ekspertëve ndërkombëtar dhe individual që kanë ardhur sot në samit. Dy qëllime kryesore jemi duke i targetuar me PowerToHr. E para ka të bëjë me rrjetëzimin, me të gjitha këta individë sidomos të burimeve njerëzore të kesh një vend ku mund të lidheni me njeri tjetrin, t’i shkëmbejmë përvojat e ndryshme, interesat e ndryshme, të gjendet një mundësi për bashkëpunim, parter të ri. Dhe e dyta është për të hapur një platformë për njerëz, sidomos në burime njerëzore, për t’i mësuar trendet e fundit, të cilat korporatat ndërkombëtare i implementojnë në raport me njerëzit”, tha Rizaj.

Përveç kësaj, Rizaj theksoi se PowerToHr është një adresë perfekte që njerëzit të shkëmbejnë përvoja dhe të absorbojnë njohuri të reja.

Ai u shpreh i lumtur me pjesëmarrjen në këtë event, derisa nënvizoi se PowerToHr për burimet njerëzore është samiti më i madh që është organizuar ndonjëherë në Ballkan.

“PowerToHr është një adresë perfekte për njerëzit t’i shkëmbejnë përvoja dhe të absorbojnë njohuri të reja. Kemi shumë kënaqësi të madhe të sjellim njerëz prej vendeve të ndryshme të Ballkanit. Prej Maqedonisë, Bullgarisë, Bosnjës, Kroacisë, Shqipërisë dhe nga vende të ndryshme të Evropës, Gjermania, Italia…Kënaqësia më t madhe është që kur po vijnë të huaj po thonë “Uau nuk e kemi prit këtë në Kosovë”. Për burimet njerëzore mendoj se është samiti më i madh që është organizuar ndonjëherë në Ballkan”, potencoi Rizaj.

Ndër ekspertët e njohur ndërkombëtarë që ndau përvojën e tij për të pranishmit, është drejtuesi i lartë i burimeve njerëzore në kompaninë “Google”, Serkan Deveci.

Ai tregoi se në këtë kompani gjigande punon në 15 vitet e fundit, për çka tregoi rreth eksperiencës së tij se si duhet trajtuar punonjësit në mënyrë që ata të ndihen të vlerësuar në vendin e tyre të punës.

“Kam punuar në Google për 15 vjetët e fundit, ku kam mbajtur role udhëheqëse në shitje, strategji dhe burime njerëzore. Para kësaj, kam punuar në Danone në marketing dhe në NGB Bank. Gjatë karrierës sime, kam udhëhequr me një princip të fortë: për të sjellë të ardhura të qëndrueshme, nevojiten klientë të lumtur dhe për klientë të lumtur, nevojiten punonjës të lumtur. Por shpesh harrojmë këtë. Edhe me të gjithë hulumtimet rreth këtyre lidhjeve interesante, duke dëshmuar se ka një lidhje midis angazhimit të punonjësve dhe performancës financiare të kompanisë, ne ende dëgjojmë, kur përmendet angazhimi i punonjësve, që është një “çështje pa shumë rëndësi”…Për angazhimin e vërtetë të punonjësve, një kompani duhet të krijojë ato ndjenja lidhjeje, qëllimi, rritjeje. Ne duam që talentet e shkëlqyer të mund të thonë me besim: “Jam krenar që bëj pjesë në këtë komunitet”, potencoi Deveci.

Ndërkaq, për rëndësinë e këtij samiti, ku përveç nga Kosova, morën pjesë njerëz nga rajoni dhe Evropa, ka folur edhe zëvendëskryeshefi  në kompaninë e sigurimeve EuroSig, Shyqiri Bytyqi.

Ai tha se evente të tilla janë me vlerë të jashtëzakonshme, sepse sipas tij krijohet një ambient informacioni dhe mundësi për promovimin e shumë të rinjve, të cilët siç tha ai kanë mundësinë të shohin se ka kompani serioze.

"Janë evente me vlerë të jashtëzakonshme për arsye se krijohet një ambient së pari i informacionit. E dyta është një mundësi e mirë e promovimit të shumë të rinjve, që bizneset sot kanë nevojë të kenë kuadro të cilat janë të nevojshme për të përballuar lëvizjet e mëdha që po ndodhin në treg. Një mundësi që të rinjtë të shohin që ka kompani serioze, ka kompani që mund t’u krijojnë mundësi, që të kemi një stabilitet të përgjithshëm të zhvillimeve të këtyre bizneseve. Kjo është një gjë pozitive dhe kujtoj që vazhdimisht këto çështjet e panaireve që kanë të bëjnë me promovimin e të punësuarit e profesioneve është diçka pozitive", tha Bytyqi.

Për veçantinë e PowerToHr, udhëheqësja e komunikimit në kompaninë IPKO, Afrika Zyberi tha se në organizime të tilla mund të zbulohen talentë dhe profesionistë të rinj.  Ajo shprehu kënaqësinë për partneritet me PowerToHr.

"Për neve është shumë kënaqësi që jemi partner i PowerToHr si IPKO. Është më rëndësi me qenë këtu, sepse i takojmë talentet e reja, profesionistë të HR. Për neve njerëzit janë shtylla kryesore dhe forca jonë më e madhe në IPKO. Prandaj, gjithmonë e zgjedhim me qenë partnerë të eventeve të tilla", tha Zyberi.

Ky samit u organizua në kuadër të tri skenave paralele me mbi 40 folës nga kompani globale si Google, META, Booking, Adidas dhe Wolt e ekspertë ndërkombëtarë e vendorë, raporton KosovaPress.

/Kosovapress/