Kosova vendos regjim vizash për shtetasit e Rusisë
Lexohet për: 2 min.
2 vite më parë
Linku u kopjua
Në mbledhjen e sotme të Qeverisë së Kosovës është marrë vendim që të vendoset regjim i vizave për shtetasit e Rusisë.
Me këtë rast, kryeministri Albin Kurti tha se shtetasit rusë me pasaportë të rregullt, zyrtare e diplomatike si dhe ata që kanë leje qëndrimi biometrik të lëshuar nga shtetet e Schengenit do të obligohen të pajisen me vizë të Kosovës për hyrje, tranzit dhe qëndrim në Kosovë.
“Me pezullim të këtyre dy pikave, të gjithë shtetasit e Federatës ruse me pasaportë të rregullt apo diplomatike dhe ata që kanë leje qëndrim biometrik valid të lëshuar nga shtetet e zonës shëngen do të duhet të pajisen me vizë për hyrje në Kosovë”, tha ai.
Zëvendësministrja e Punëve të Jashtme, Liza Gashi ka arsyetuar këtë vendim për pezullimin e përkohshëm të zbatimit të pikave 2 dhe 5 të vendimit të Qeverisë të datës 29 nëntor 2013.
“Aprovimi i një vendimi të tillë do tw kontribuonte në ruajtjen e sigurisë kombëtare, rajonale dhe globale, po ashtu në mbrojtjen e interesave shtetërore dhe pjesëmarrjen aktive të Republikës së Kosovës në aleancat ndërkombëtare”, theksoi Gashi.
