Gati 10.000 vdekje nga Covid-19 u raportuan në dhjetor 2023, tha Organizata Botërore e Shëndetësisë (OBSH) të mërkurën, duke paralajmëruar se virusi ende qarkullon edhe pse nuk është aq i dukshëm.

Të dhënat nga burime të ndryshme tregojnë një rritje të infeksioneve në dhjetor, e nxitur nga grumbullimet gjatë festave të Krishtlindjes dhe varianti JN.1, tashmë më i përhapuri në botë, sipas OBSH-së.

“Megjithëse Covid-19 nuk është më një kërcënim global për shëndetin, virusi vazhdon të përhapet, modifikohet dhe vret”, tha kreu i agjencisë shëndetësore të OKB-së, Tedros Adhanom Ghebreyesus, në një konferencë për shtyp në Gjenevë.

Gati 10.000 vdekje u raportuan në OBSH muajin e kaluar, shtrimet në spital u rritën 42 për qind dhe pranimet në kujdesin intensiv 62 për qind krahasuar me nëntorin. Por numrat bazohen në të dhënat nga më pak se 50 vende, kryesisht në Evropë dhe Amerikë, tha Tedros.

“Sigurisht që ka një rritje në vendet e tjera që nuk e raportojnë. Ashtu si qeveritë dhe individët po ndërmarrin veprime kundër sëmundjeve të tjera, ne të gjithë duhet të vazhdojmë të marrim masa kundër Covid-19”, tha shefi i OBSH-së.

“Edhe pse 10,000 vdekje në muaj janë shumë nën kulmin e pandemisë, ky numër i vdekjeve të parandaluara është i papranueshëm”, shtoi ai.

Tedros u bëri thirrje qeverive të mbajnë kontrollin e virusit dhe të sigurojnë qasje në teste, trajtime dhe vaksina të lira dhe të besueshme.

"Ne vazhdojmë t'u bëjmë thirrje individëve që të vaksinohen, të testohen, të mbajnë maska ​​ku është e nevojshme dhe të sigurojnë që hapësirat e brendshme të mbushura me njerëz të ajrosen rregullisht," tha ai.

Tedros shpalli fundin e emergjencës globale të shkaktuar nga Covid-19 në maj 2023, më shumë se tri vjet pasi virusi u zbulua për herë të parë në Wuhan, Kinë në fund të vitit 2019.