Federata e Futbollit të Kosovës ka bërë të ditur agjendën zyrtare të aktiviteteve përpara ndeshjes së shumëpritur ndërmjet Kosovës dhe Turqisë, e cila zhvillohet në stadiumin “Fadil Vokrri” në Prishtinë.

Sipas njoftimit, dita e sotme do të nisë me Kombëtaren e Kosovës, ku fillimisht në ora 10:30 do të mbahet konferenca për media, ndërsa menjëherë pas saj, në ora 11:00, “Dardanët” do të zhvillojnë stërvitjen zyrtare. Ndërkohë, në mbrëmje aktivitetet vazhdojnë me përfaqësuesen e Turqisë, e cila në ora 18:00 do të dalë për ecje në fushë, ndërsa në ora 18:15 do të mbajë konferencën për media.

Kjo përballje konsiderohet vendimtare për të dyja kombëtaret në kuadër të fazës “play-off”, me Kosovën që vjen pas një forme shumë të mirë dhe me mbështetje të madhe nga tifozët vendas. Në anën tjetër, Turqia synon të konfirmojë statusin e saj si një kundërshtar i fortë, duke paralajmëruar një ndeshje të fortë dhe spektakolare në kryeqytet.