Kombëtarja e Kosovës do të paraqitet me fanella të brendit të njohur adidas në ciklin e ri të garave evropiane, në kuadër të Skemës së Asistencës për Veshje të UEFA-s. Përmes kësaj skeme, Federata e Futbollit e Kosovës do të furnizohet me pajisje sportive dhe veshje për ndeshje e stërvitje, të dizajnuara në mënyrë të personalizuar dhe në përputhje me identitetin e ekipit kombëtar.

Skema e UEFA-s, e themeluar në vitin 2007, ka për qëllim mbështetjen e federatave kombëtare duke u ofruar veshje dhe pajisje sportive të standardeve të larta. Në ciklin e ri, adidas është përzgjedhur si furnizues zyrtar pas një procesi tenderimi që ka vlerësuar cilësinë, përvojën dhe përballueshmërinë.

Në dy sezonet e ardhshme, dhjetë kombëtare evropiane, përfshirë Kosovën, do të paraqiten me dizajne të reja të adidas, të zhvilluara në bashkëpunim me federatat përkatëse. Përveç furnizimit me fanella dhe pajisje, FFK do të ketë qasje edhe në shërbimin “Locker Room” të adidas, i cili mundëson dizajnim dhe porositje të veshjeve të personalizuara për ekipet, duke synuar standarde të larta në performancë dhe prezantim ndërkombëtar.

KosovaPress