KOK i gëzohet vendimit për liberalizimin e vizave
Parlamenti Evropian miratoi sot vendimin për liberalizimin e vizave për qytetarët e Kosovës, me çka edhe procedurat për këtë çështje i afrohen fundit.
Sikurse qytetarët e Kosovës, këtij lajmi i është gëzuar edhe Komiteti Olimpik i Kosovës (KOK), i cili uroi të gjithë sportistët dhe federatat e sportit për këtë vendim, raporton KosovaPress.
“Vendimi për liberalizimin e vizave për qytetarët e Kosovës, është lajm i mirëseardhur edhe për sportin e Kosovës, konkretisht sportistët, për të cilët pajisja me vizë vazhdon të mbetet sfidë për pjesëmarrje në garat ndërkombëtare.
KOK uron gjithë sportistët dhe federatat sportive për vendimin e marrë sot, me shpresën dhe besimin se sportistët tanë prej 1 janarit 2024 do të mendojnë vetëm për rezultatet e tyre”, shkroi KOK në “Facebook”.
Miratimi i vendimit për liberalizimin e vizave u bë pa votim, pasi nuk kishte asnjë kundërshtim.
