Trajneri gjerman Jurgen Klopp ka thënë se është gjë e mirë që kritikët e Thiago Alcantara nuk e drejtojnë Liverpool-in, ndërsa tregoi që nuk kishte dyshime që ylli spanjoll do t’i përshtatej stilit të lojës së tij.

Reprezentuesi spanjoll është në formën më të mirë të karrierës së tij në “Anfield Road”, ku këtë gjë e dëshmoi edhe në fitoren 4:0 të së martës ndaj Manchester United, përcjell KosovaPress.

Por, Thiago kaloi një vit të vështirë debutues me Liverpoolin, duke humbur 10 javë për shkak të një lëndimi në gju të shkaktuar nga një ndërhyrje e Richarlison kundër Evertonit, dhe duke luftuar si mesfushor shkatërrues kur lëndimet në mbrojtje të Liverpool bënë që Fabinho të luante si qendërmbrojtës.

Në të kaluarën tifozët e kritikuan Thiagon për stilin e tij të lojës, por Klopp tha që ish-ylli i Bayern Munichut ka pasur gjithmonë inteligjencën e duhur për tu adaptuar.

“Njerëzit kishin dyshime nëse ai do të përshtatej në stilin tonë të lojës, por faleminderit Zotit që këta njerëz nuk marrin vendime. Nëse një lojtar e qetëson lojën në disa momente për arsye të ndryshme, njëra nga ato arsye është që të ndalet dhe të shikojë, ose çfarëdo çoftë, por sigurisht nuk ishte diçka që ne e kemi menduar”, tha Klopp.

“Gjëja më e rëndësishme është që Thiago dëshironte të na bashkohej dhe ai ishte i vetëdijshëm për mënyrën se si ne luanim futboll. Ai është një person i vërtetë i futbollit dhe mendon shumë për futbollin. Ai e dinte se si luajmë ne dhe e dinte se do të përshtatej dhe ne e dinim këtë gjë po ashtu”, shtoi trajneri gjerman.

Në këtë sezon, në 30 paraqitje në të gjitha garat për Liverpoolin, Thiago Alcantara ka regjistruar dy gola dhe tre asistime mbi emrin e tij.