Angazhim më i madh dhe konstruktivitet u kërkua nga Kosova dhe Serbia për normalizimin e marrëdhënieve në kuadër të dialogut të Brukselit. Në tryezën e organizuar të mërkurën nga Grupi për Studime Juridike dhe Politike (GLPS) për të ardhmen e dialogut, u tha mes tjerash se Prishtina dhe Beogradi aktualisht nuk kanë gatishmëri për arritjen e një marrëveshje finale dhe zbatimin e ujdive aktuale.

Profesori në universitetin “Johns Hopkins” në ShBA, Daniel Server tha se dialogu teknik ishte shumë më produktiv sesa dialogu i tanishëm politik.

Ai theksoi se njohja reciproke duhet të jetë qëllim final i dialogut, mirëpo shtoi se aktualisht nuk po e sheh se mund të ndodh në këto rrethana.

Krahas kësaj, analisti amerikan tha se vazhdimi i Administratës Biden në ShBA edhe për një mandat të dytë do të jetë më mirë për Kosovën dhe Ballkanin, sesa rikthimi i ish presidentit Donald Trump.

Pjesë e tryezës ishte edhe deputetja e LDK-së, Doarsa Kica-Xhelili, e cila tha se Kosova dhe Serbia kanë bërë hapa të vegjël në implementimin e marrëveshjeve në dialog.

Ndërkaq, ish ministri i Punëve të Jashtme  të Shqipërisë, Ditmir Bushati, kërkoi nga Bashkimi Evropian të merr një rol më aktiv në dialog, derisa tha se do të jetë i vështirë ndryshimi i qasjes destruktive të Serbisë në këtë proces.

Në anën tjetër, kryetarja e Komitetit të Helsinkit për të drejtat e njeriut në Serbi, Sonja Biserko, tha se nuk pret marrëveshje mes Kosovës dhe Serbisë pa prezencën e Shteteve të Bashkuara të Amerikës.

Po ashtu penalistët kërkuan që Bashkimi Evropian të ketë qasje të barabartë në dialog mes palëve.

Lajmi i plotë në sistemin me parapagim...