Kapet sasi e madhe armatimi në veri, Sveçla: Nuk ndalemi për siguri e rend
Siguri
Lexohet për: 2 min.
1 muaj më parë
Linku u kopjua
Policia e Kosovës ka gjetur sot pasdite armatim të konsiderueshëm në një lokacion afër Urës së hekurit në Zveçan, ku përveç armëve të gjata janë konfiskuar edhe fishekë, uniforma të ushtrisë së Serbisë e të policisë së Kosovës, eksploziv, radio-lidhje dhe të ngjajshme.
Kjo u bë e ditur nga Mnistri i Brendshëm Xhelal Sveçla, gjatë një konference të jashtëzakonshme për media në veri të Mitrovicës, i cili së bashku me drejtorin e policisë, Gazmend Hoxha, kanë pasqyruar suksesin e radhës të pjesëtarëve të policisë së Kosovës.
Sipas ministrit Sveçla, ky arsenal armësh i llojeve të ndryshme ka qenë i paraparë të përdoret nga grupet terroriste kundër institucioneve të Republikës së Kosovës, në radhë të parë ndaj pjesëtarëve të policisë, por pa kursyer edhe të tjerët.
Ai përmendi se këto grupe janë të udhëhequra nga Millan Radojçiq, ndërsa mbështeten e financohen nga president i Serbisë, Aleksandar Vuçiq.
Ministri Sveçla premtoi se policia nuk do të ndalet për të ofruar siguri, qetësi e stabilitet, qoftë për qytetarët, ashtu edhe për sovranitetin dhe integritetin territorial të Republikës së Kosovës.
Ai theksoi se të gjithë ata që janë të përfshirë në akte të tilla terroriste, të cilët cenojnë rendin kushtetues, sovranitetin, integritetin territorial dhe shkelin ligjin, herët a vonë do të vihen para drejtësisë dhe do të dënohen.
Ndërkaq, drejtori i përgjithshëm i policisë së Kosovës, Gazmend Hoxha, ka dhënë numra të saktë të të gjithë asaj që është konfiskuar sot gjatë këtij operacioni policor.
Ai bëri të ditur se një person është duke u intervistuar në polici, si i dyshuar me lidhjen e tij drejtpërdrejt me këtë arsenal armësh.
Në anën tjetër, burime të KosovaPress-it nga veriu kanë bërë të ditur se në këto momente është arrestuar personi me inicialet B. R. (emri i njohur për redaksinë) ish pjesëtar i policisë së Kosovës, i cili ka mbajtur pozitë të lartë në drejtorinë e policisë së Kosovës në rajonin e veriut. /A. Damati/