Futbollistët e Juventusit kanë dështuar të shënojnë fitore në udhëtim sonte ndaj Lecce duke luajtur baras me rezultat 1:1.

Ndeshja në stadiumin “Via del Mare” nuk ishte aq interesante, por duket se ndikoi mungesa e nëntë lojtarëve të ekipit të parë të “Zonjës së vjetër”, për shkak të lëndimeve të njëpasnjëshme.

Golin për mysafirët e shënoi Andrea Cambiaso, pas asistimit të Teun Koopmeiners, në minutën e 68-të, ndërsa Rebiq i siguroi një pikë të madhe Lecce-s në minutën e tretë të kohës shtesë.

Juventusi pas 14 xhirosh mbetet ekipi i vetëm në Serie A pa humbje, duke u renditur në pozitën e gjashtë me gjithsej 26 pikë, teksa Lecce ndodhet në zonën e rrezikshme (16) me vetëm 13 pikë.

Napoli, i cili sot fitoi si mysafir ndaj Torinos 1:0, kryeson tabelën me 32 pikë. Atalanta, e cila nesër takohet me Romën si mysafir, renditet e dyta me 28 pikë.

Inter e Fiorentina, po ashtu kanë nga 28 pikë, në pozitat tre dhe katër, por me një ndeshje më pak, pasi takimi ndërmjet këtyre dy skuadrave sot u ndërpre. Lazio, i cili humbi sot në udhëtim nga Parma 1:3, renditet në pozitën e pestë po ashtu me 28 pikë, por me gol-diferencë më të dobët.