Kristian Prenga ishte shumë pranë një surprize të madhe ndaj Anthony Joshua-s, por ish-kampioni i botës arriti të rikthehej dhe ta mbyllte përballjen me nokaut teknik në raundin e dytë, në duelin kryesor të mbrëmjes së boksit në Xhedah të Arabisë Saudite.

Prenga e nisi meçin në mënyrë mbresëlënëse, duke hyrë në arenë nën tingujt e këngës "Kur ka ra kushtrimi në Kosovë", ndërsa atmosfera u bë edhe më emocionuese gjatë intonimit të himnit kombëtar shqiptar para mijëra të pranishmëve.

Që në sekondat e para të ndeshjes, boksieri nga Mirdita e befasoi Joshua-n me një uppercut të fuqishëm që e rrëzoi në tapet. Britaniku u ngrit, por gjatë pjesës së mbetur të raundit të parë dukej i lëkundur dhe nën presion të vazhdueshëm nga Prenga, i cili krijoi përshtypjen se kishte kontrollin e plotë të duelit. Joshua u shpëtua nga fundi i raundit, pasi gongu i dha kohë të rikuperohej.

Në raundin e dytë, Joshua ndryshoi plotësisht qasjen. Ai filloi të kontrollonte më mirë distancën me grushtin e majtë dhe goditjet e tij të djathta nisën të gjenin objektivin. Ndërkohë, Prenga humbi ritmin dhe iniciativën që kishte ndërtuar në fillim të sfidës.

Rreth 40 sekonda para përfundimit të raundit të dytë, Joshua lëshoi një seri goditjesh të fuqishme që e rrëzuan sërish Prengën. Boksieri shqiptar nuk arriti të ngrihej brenda numërimit të gjyqtarit, duke bërë që përballja të përfundonte me fitore me nokaut teknik për Anthony Joshua.

Pas ndeshjes, Joshua shfrytëzoi intervistën e parë për të vlerësuar paraqitjen e Kristian Prengës. Ai e cilësoi shqiptarin një boksier të fuqishëm dhe u shpreh i bindur se e pret një e ardhme e mirë në ring. Më pas, britaniku i dërgoi edhe një mesazh rivalit të tij të madh, Tyson Fury, duke lënë të kuptohet se synon duele të mëdha në vazhdim të karrierës.

/Kosovapress/