Interesim minimal i trajnerëve për ta marrë drejtimin e Kosovës në boks
Lexohet për: 2 min.
9 muaj më parë
Linku u kopjua
Përfaqësuesja e Kosovës në boks që nga 19 gushti i vitit të kaluar, ka mbetur pa kryetrajner. Kjo pasi ish-përzgjedhësi, Besim Brahimi dha dorëheqje duke përmendur disa arsye, si mungesa mbështetjes financiare, mosmarrëveshje me Bordin e Federatës së Boksit, por edhe ndërhyrje të drejtuesve të federatës në selektimin e sportistëve që marrin pjesë në garat ndërkombëtare.
Zëvendësimi i Brahimit nuk është bërë ende, ani pse Federata e Boksit së fundi ka shpallur konkurs për ta gjetur trajnerin e ri të Kosovës. Edhe pas hapjes së këtij konkursi, interesimi ka qenë fare i vogël nga ana e trajnerëve vendor.
Sekretari i Federatës së Boksit të Kosovës, Latif Demolli, ka konfirmuar për KosovaPress, se në konkurs janë paraqitur vetëm tre kandidat dhe se kjo, sipas tij, është për keqardhje.
Mungesa e një page të rregullt konsiderohet të jetë njëra nga arsyet e mungesës së interesimit nga ana e kandidatëve për ta marrë këtë pozitë. Por, ish-trajneri i Kosovës, Besim Brahimi, ka gjetur vërejtje edhe në mënyrën se si punohet brenda kësaj federate.
Duke parë këtë mosinteresim të trajnerëve vendor, Demolli ka zbuluar se kanë kërkuar nga Federata Botërore e boksit që ta dërgojnë një trajner të huaj në Kosovë.
Vendimi për emërimin e trajneri të ri të Kosovës në boks pritet të merret brenda pak ditëve.
