Polemika publike mes juristit Bardhyl Hasanpapaj dhe publicistit Veton Surroi rreth aktgjykimit të Gjykatës Kushtetuese për dekretin e Presidentes Vjosa Osmani ka vazhduar edhe sot.

Pas reagimit të fundit të Surroit, Hasanpapaj ka publikuar një kundërpërgjigje të re me titullin “Dekreti, sporti dhe VAR-i”, ku jo vetëm që mbron sërish interpretimin e tij juridik, por i bën edhe ftesë publike Surroit për debat në çdo format, përfshirë edhe podkastin e tij.

Dr. sc. Bardhyl Hasanpapaj, profesor universitar, jurist dhe analist i njohur, thotë se e vlerëson debatin e zhvilluar deri më tani dhe shpreh gatishmëri për ta vazhduar atë në çdo kohë dhe në çdo platformë.

“E falënderoj z. Surroin për debatin konstruktiv dhe shpreh gatishmëri për një të tillë në çdo kohë dhe format, qoftë edhe në podkastin e tij. Debati i argumentuar është gjithmonë i dobishëm për jetën publike dhe shoqërinë demokratike që e aspirojmë”, shkruan Hasanpapaj.

Në reagimin e tij, ai vlerëson se gjatë polemikës palët kanë diskutuar shpesh nga këndvështrime të ndryshme.

“Unë kam diskutuar një çështje juridike kushtetuese dhe institucionale. Z. Surroi nisi me juridikun, kaloi te politika dhe e përfundoi me letërsinë. Secila fushë ka bukurinë e vet, por ndeshja jonë nisi në terrenin kushtetues”, thekson ai.

Hasanpapaj sqaron se nuk ka argumentuar se dekreti presidencial është kushtetues për shkak se prodhoi sqarim kushtetues, por se Gjykata Kushtetuese nuk ka konstatuar shkelje kushtetuese dhe se aktgjykimi solli qartësi për një situatë që deri atëherë kishte qenë e paqartë.

Sipas tij, këto janë dy çështje të ndryshme që nuk duhet të ngatërrohen në debat.

Në pjesën përmbyllëse të reagimit, Hasanpapaj i referohet analogjisë së përdorur nga Surroi dhe sjell një krahasim nga sporti.

“Sa për analogjinë me aksidentet dhe semaforët, nuk pretendoj ekspertizë në komunikacion. Por, në sport ndonjëherë një rast i diskutueshëm e shtyn federatën të sqarojë rregullat ose të përdorë VAR-in. Kjo nuk do të thotë se lojtari ka bërë patjetër faull apo ka shkaktuar penallti; vetëm se rregulli kishte nevojë për interpretim përfundimtar. Pikërisht këtë bëri Gjykata Kushtetuese”, shkruan ai.

Hasanpapaj shton se këtë e thotë me respekt për bashkëdebatuesin dhe me bindjen se institucionet kushtetuese kanë folur aty ku duhej të flisnin.

Bardhyl Hasanpapaj është kandidat për deputet nga Lidhja Demokratike e Kosovës (LDK), me numrin 34 në listën zgjedhore të kësaj partie.

Më poshtë mund ta lexoni të plotë reagimin e Bardhyl Hasanpapajt.

/Kosovapress/