Kryetari i AAK-së, Ramush Haradinaj, ka deklaruar se kandidati i kësaj partie për kryeministër në zgjedhjet e 7 qershorit, Ardian Gjini, do t’u ofrojë mbështetje më të madhe fermerëve dhe sektorit të bujqësisë.

Ai bëri këto komente gjatë një vizite në fermën bujqësore të Muharrem Hotit dhe Imer Durakut, në Krushë të Madhe të Rahovecit.

“Në këtë kontekst, u ritheksua se në qeverisjen e Ardian Gjinit, fermerët do të jenë në qendër të vëmendjes dhe mbështetjes institucionale, me synim fuqizimin e prodhimit vendor dhe zhvillimin e qëndrueshëm të bujqësisë në vend”, thuhet në një njoftim të AAK-së.

Gjatë vizitës në Krushë të Madhe, në kuadër të aktivitetit “Korr e ha n’katun”, Haradinaj tha se pati mundësinë të shohë nga afër punën dhe përkushtimin e fermerëve në këtë zonë.

Ai theksoi se fermerët janë njoftuar me planet qeverisëse të Ardian Gjinit dhe mbështetjen që, sipas tij, do ta kenë në të ardhmen.

Haradinaj vlerësoi edhe angazhimin e kryetarit aktual të Rahovecit, Smajl Latifi, për fermerët, duke thënë se ai ka qenë vazhdimisht pranë tyre,,” edhe në mungesë të mbështetjes së nevojshme nga niveli qendror”. /KosovaPress/