“The Athletic” pretendon se Mason Greenwood ka rënë dakord për kushtet personale dhe ka pranuar një transferim në Olympique Marseille nga Manchester United, duke refuzuar Lazion, Napolin dhe Juventusin.

Ndërsa Marseille kishte rënë dakord tashmë për një tarifë transferimi me Manchester United javën e kaluar, lojtari po hezitonte, raporton KosovaPress.

Ai ishte pjesërisht i ngecur për shkak të denoncimit nga kryetari i bashkisë së Marseille dhe shumë tifozë, të cilët protestuan se nuk e donin atë në ekipin e Ligue 1 për shkak të akuzave të tij të kaluara për abuzim në familje.

Kjo i lejoi Lazios, Napolit dhe Juventusit të mbeten potencialisht në garë për të nënshkruar me lojtarin e Manchester United këtë verë.

Megjithatë, këtë pasdite sugjerohet që Greenwood ka pranuar transferimin te Marseille dhe ka rënë dakord për kushtet personale, kështu që tashmë është një punë e përfunduar.

Ai ende duhet të udhëtojë, të kalojë testet mjekësore dhe të nënshkruajë kontratën, por puna e vështirë ka përfunduar për skuadrën e Roberto De Zerbit.

Ata po paguajnë 27.6 milionë euro plus 4 milionë euro shtesë dhe i japin Manchester United deri në 50 për qind të tarifës së shitjes.