Kompania e Deminimit e Gardës Kombëtare të Forcës së Sigurisë së Kosovës (FSK), ka filluar operacionin e deminimit humanitar për pastrimin e fushave të minuara dhe fushëbetejave, duke u bazuar në planifikimet për 2024. Komandanti i Gardës Kombëtare, gjeneralbrigade Naim Haziri së bashku me komandantin e Regjimentit të Mbrojtjes Civile, nënkolonel Gezim Sada dhe zëvendës komandanti i KDS-së, kolonel Ilir Shyti vizituan ekipet e EOD-së, në Parkun e Lirisë në Ferizaj për të parë nga afër mbarëvajtjen e operacionit.
Gjatë këtij viti, njësitë e deminimit do të jenë të angazhuara në pastrimin e tri lokacioneve në territorin e Kosovës: fshatin Muradem, majën e Cvilenit në zonën e Prizrenit dhe Parkun e Lirisë në Ferizaj, gjithashtu do të ofrojnë kujdestari 24/7 për largimin e mjeteve të pashpërthyera që mund të hasen nga qytetarët.
Pjesëtarët e FSK-së trajnohen profesionalisht me qëllim që të jenë sa më të përgatitur për t’u dalë në ndihmë qytetarëve me të gjitha kapacitetet kurdo dhe kudo që kërkohet.
