Fondi i Ballkanit Perëndimor shpall 12 përfituesit e rinj të granteve të tij rajonalë, me vlerë 30.000 euro secili.
Këto grante, të bashkëfinancuara nga Bashkimi Evropian, kanë si synim të mbështesin projektet rajonale në Ballkanin Perëndimor.
I pranishëm në mbrëmjen e shpërndarjes së çmimeve, të mbajtur në Hotel International në Tiranë, Ambasadori i Delegacionit Europian i atashuar në Shqipëri deklaroi “Bashkëpunimi brenda rajonit nuk është vetëm një parakusht për anëtarësimin në BE, por një gur themeli për prosperitetin. Jam krenar për Fondin e Ballkanit Perëndimor, të cilin vazhdojmë ta mbështesim me 1 milion euro shtesë, dhe jam i lumtur të shoh se si ai ndihmon OJQ-të të realizojnë ide të reja që kontribuojnë në ndërtimin e shoqërive më gjithëpërfshirëse, më të larmishme dhe më të barabarta. Këto janë idetë dhe projektet që mund të transformojnë vendet e rajonit, të krijojnë rrjete rajonale të qëndrueshme dhe të hapin rrugën për integrimin e rajonit në BE".
Dr. Gjergj Murra, Drejtori Ekzekutiv i Fondit të Ballkanit Perëndimor, komentoi: "Falë partneritetit strategjik që kemi krijuar me Bashkimin Evropian, tani kemi një ndikim edhe më të madh në rajon. Kurrë nuk mund të lejojmë të harrojmë se alternativa e një rajoni ku mungon bashkëpunimi, nuk mund të jetë një alterantivë reale".Çdo grant, duke ofruar mbështetje deri në 30,000 EUR, mbështet iniciativa në bashkëpunimin rajonal në fusha të ndryshme, përfshirë arsimin, kulturën, zhvillimin e qëndrueshëm, agjendën e gjelbër, barazinë gjinore dhe të drejtat e njeriut.
Fondi i Ballkanit Perëndimor është një organizatë rajonale e themeluar në vitin 2017 nga Ministritë e Punëve të Jashtme të rajonit për të promovuar pajtimin dhe bashkëpunimin në Ballkanin Perëndimor. Që nga themelimi i tij, ka ndarë mbi 300 grante për shoqërinë civile.
