Trajneri i Gjermanisë Julian Nagelsmann nuk po shpenzon shumë kohë duke menduar për yllin spanjoll Lamine Yamal, por më shumë duke marrë parasysh planet e tij për lojtarin e tij Jamal Musiala, përpara çerekfinales së Euro 2024 të së premtes.

Yamal, lojtari më i ri që ka luajtur ndonjëherë në një Euro, e ka pushtuar turneun, duke ndihmuar Spanjën të arrijë katër fitore radhazi me shpejtësinë dhe lojën e tij krijuese në krah, raporton KosovaPress.

Gjermanët do të duhet të gjejnë mënyra për të kontrolluar shpejtësinë dhe aftësitë e adoleshentit, tha Nagelsmann në një konferencë për shtyp, por tha se ai ishte më i fokusuar te sulmuesi i tij krijues Musiala.

"Fokusi im është më pak te Yamal dhe më shumë te Jamal. Nga pikëpamja e sulmit, ne mund të bëjmë shumë gjëra vetë," tha Nagelsmann.

Musiala, golashënuesi më i mirë i turneut, ka shënuar tre herë deri më tani.

“Yamal është një talent i madh. Ai ka qenë shumë i qëndrueshëm këtë vit dhe nuk ka shumë që janë kaq të qëndrueshëm, edhe për klubin e tij Barcelonën. Ai është vetëm 16 vjeç, që gjithashtu do të thotë se lojtarët tanë kanë një shans për të përballuar. Do të shohim se si do të reagojë kur gjërat të bëhen të vështira”, tha Nagelsmann.

Gjermania do të përballet nesër me Spanjën në “MHPArena” të Stuttgartit me fillim nga ora 18:00.