Fer Volley ka bërë një hap gjigant drejt titullit në Raiffeisen Superligën A të volejbollit për femra, pasi mposhti rivalin lokal, Ferizajin, me rezultat të pastër 3-0 në finalen e tretë të "Play-Off"-it.

Ndeshja nisi me një set të parë mjaft të luftuar që përfundoi 25/23, por stabiliteti dhe kontrolli i Fer Volley u reflektua edhe më qartë në setin e dytë ku dominuan 25/16. Ndonëse Ferizaj u përpoq të reagonte në setin e fundit, qetësia e lojtareve të Fer Volley në momentet vendimtare bëri që ato ta mbyllnin setin 25/22 dhe të gjithë takimin me fitore bindëse, duke treguar mbrojtje të organizuar dhe efikasitet të lartë në sulm.

Rivaliteti mes dy skuadrave ferizajase ka qenë i lartë gjatë gjithë finales, me Fer Volley që fitoi ndeshjen e parë 3-1 dhe Ferizajin që u kundërpërgjigj në të dytën me 3-2, por tashmë Fer Volley është vetëm një fitore larg kurorës së kampionit.