Shkencëtarët po sugjerojnë se ëndrrat nuk janë thjesht të çrregullta apo të pakuptimta, por mund të funksionojnë si një lloj simulimi mendor që na përgatit për sfidat e jetës së përditshme.

”Sipas një studimi të fundit, përjetimet gjatë gjumit mund të ndihmojnë trurin të praktikojë situata reale, sidomos ato që lidhen me marrëdhëniet shoqërore dhe mbijetesën”, sipas “The Times”.

Studiuesit zbuluan se ëndrrat shpesh pasqyrojnë qëllime themelore njerëzore, si siguria personale, ndërtimi i marrëdhënieve dhe kujdesi për familjen.

Duke i përjetuar këto skenarë gjatë gjumit, njerëzit mund të jenë më të përgatitur për t’i përballuar në jetën reale.

Autori i studimit, Frederick Thomas, shpjegon se ëndrrat mund të shërbejnë si një “hapësirë praktike” ku mendja përpunon sfida sociale reale.

Kjo përfshin situata që lidhen me reputacionin, marrëdhëniet, konkurrencën dhe mbijetesën, duke i dhënë trurit mundësinë të testojë reagime të ndryshme.

Sipas ekipit kërkimor, ëndrrat funksionojnë si një hapësirë simulimi shumëfunksionale, ku truri mund të praktikojë role të ndryshme shoqërore njëkohësisht.

Kjo mund të ndihmojë individët të menaxhojnë më mirë ndërveprimet komplekse gjatë kohës kur janë zgjuar.

Analiza e rreth 400 pjesëmarrësve tregoi se temat më të zakonshme në ëndrra lidhen me vetëmbrojtjen dhe statusin shoqëror, si ndjekja nga dikush ose dështimi në një provim.

Studiuesit vunë re gjithashtu se disa motive shfaqen shpesh së bashku, duke treguar se ëndrrat organizojnë sfida të ndryshme në mënyrë domethënëse.

Një studim tjetër sugjeron se edhe ëndrrat e frikshme mund të kenë efekt pozitiv, pasi ndihmojnë në përpunimin e emocioneve.

Nëse ato nuk prishin rëndë gjumin, ndjenja e frikës gjatë ëndrrave mund të përmirësojë aftësinë për të menaxhuar emocionet gjatë ditës