Thashethemet për interesimin e Manchester United për Paulo Dybala janë në rritje, dhe “La Gazzetta dello Sport” pretendon se argjentinasi është duke pritur për një telefonatë nga Roma për të mësuar planet e tyre afatgjata.

Burimet nga mediat argjentinase raportuan pak ditë më parë se Manchester United ishte i interesuar për yllin e Romës, Dybala, dhe edicioni i sotëm i “La Gazzetta dello Sport” citon burime angleze që konfirmojnë se “La Joya” është në axhendën e “Djajve të Kuq”.

Dybala ka një klauzolë prej 13 milionë euro për klubet jashtë Serie A dhe do të jetë e vlefshme për të gjithë muajin korrik. Ish- sulmuesi i Juventusit ka një vit të mbetur në kontratën e tij me “Giallorossët”, por ajo do të zgjatet automatikisht deri në vitin 2026 nëse ai mbledh 50% të paraqitjeve gjatë periudhës së tij trevjeçare në klub.

Dybala është i lumtur që mbetet në “Olimpico”, por është duke pritur për një telefonatë nga klubi për të mësuar rreth planeve të tyre afatgjata. Sulmuesi aktualisht ndodhet në Argjentinë me partneren e tij Oriana Sabatini dhe ata do të martohen më 20 korrik.

Dybala tha disa javë më parë se do të ishte "shumë e vështirë" për të që të largohej nga Seria A, megjithëse ai la derën e hapur për një lëvizje të mundshme në Angli ose Spanjë.