Dorëheqje e papritur te Barcelona, klubi thërret konferencë të jashtëzakonshme
Nënkryetari i Barcelonës Eduard Romeu ka paraqitur dorëheqjen e tij si drejtor i Barçës, është bërë e ditur sot nga klubi katalanas. Me këtë rast, presidenti Joan Laporta ka thirrur një konferencë për shtyp për të shpjeguar arsyet e dorëheqjes së tij.
“FC Barcelona informon se Eduard Romeu, nënkryetar i Zonës Ekonomike të Klubit, i ka paraqitur dorëheqjen presidentit Joan Laporta, duke përmendur papajtueshmërinë me përkushtimin e plotë në punën e tij profesionale . Presidenti Laporta e ka pranuar dorëheqjen duke e falënderuar për punën e tij në krye të Zonës Ekonomike të Klubit, fokusuar në zhvillimin e planit të qëndrueshmërisë të nisur gjatë këtij mandati dhe që ka arritur të përmbysë situatën financiare të institucionit”, thuhet në njoftimin e Barcelonës, përcjellë KosovaPress.
Joan Laporta dhe Eduard Romeu, do të dalin pas pak minutash në konferencën për shtyp. Në parim nuk do të ketë kohë diskutimi dhe do të sqarohen vetëm arsyet e dorëheqjes së zëvendëspresidentit ekonomik dhe ndryshimet që do të ndodhin në strukturën e klubit që nga ky vendim.
