Një tentim vrasjeje ka ndodhur sot në Istog, ku dy persona kanë mbetur të lënduar si pasojë e therjes me thikë pas një përleshje mes disa personave. Këtë për KosovaPress e ka konfirmuar zëdhënësi i Prokurorisë Themelore në Pejë, Shkodran Nikçi.

Sipas tij, njëri nga të lënduarit ndodhet në gjendje kritike ku po trajtohet në Qëndrën Klinike Universitare të Kosovës (QKUK), ndërsa personi tjetër ka marrë trajtim mjekësor në Spitalin e Pejës dhe është jashtë rrezikut për jetën.

Drejtori i Emergjencës në QKUK, Naser Syla për KosovaPress tha se personi është transferuar në QKUK nga Spitali i Pejës në gjendje të rëndë me plagë therëse.

“Një pacient i sjellë nga Spitali i Pejës, i lindur në vitin 2005, me plagë therëse, në gjendje të rëndë dhe jostabile. Pacienti është transferuar në sallën operative të QKUK-së dhe po intervenohet nga ekipet e kirurgjisë torakale, kirurgjisë abdominale, ORL-së dhe anestezionit. Pas intervenimit, pacienti do të transferohet në Mjekimin Intensiv Qendror (MIQ) për trajtim të mëtejmë”, tha ai.

Ndërkaq, Prokuroria e ka cilësuar këtë rast si “Vrasje në tentativë”

“Për shkak se kemi të bëjmë me persona të mitur në këtë rast jemi të rezervuar në dhënien e më shumë informatave. Policia dhe Prokuria kanë dalë në vendin e ngjarjes për të marrë veprimet e nevojshme hetimore”, tha Nikçi.

/Kosovapress/