Ministri italian i Mbrojtjes Guido Crosetto shprehu sot rezerva në lidhje me urdhër-arrestin e Gjykatës Ndërkombëtare të Drejtësisë për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, por konfirmoi se Italia do të jetë e detyruar të zbatojë urdhër-arrestin nëse ata hyjnë në këtë vend.

Duke folur gjatë një interviste televizive, Crosetto vuri në dukje se ndërsa ai beson se vendimi i gjykatës është "i gabuar", si një nënshkruese e Statutit të Romës, Italia duhet të respektojë ligjin ndërkombëtar.

"Meqenëse ne jemi palë e gjykatës, nëse Netanyahu dhe Gallant vijnë në Itali, do të na duhej t'i arrestojmë. Ky nuk është një vendim politik, por zbatim i legjislacionit ndërkombëtar," tha ai.

Urdhër arresti - cilat do të jenë pasojat ligjore për Netanyahun dhe Gallant? • KosovaPress

Por, zëvendëskryeministri dhe ministri i Jashtëm italian Antonio Tajani i bëri jehonë një toni më të kujdesshëm.

"Ne do të shqyrtojmë përmbajtjen e vendimit dhe arsyet pas tij. Së bashku me aleatët tanë, ne do të vlerësojmë se çfarë do të ndodhë dhe do të përcaktojmë se çfarë veprimesh duhet të ndërmarrim dhe si të vazhdohet," tha ai.

Vërejtjet e Tajanit provokuan reagimin e opozitës Lëvizja Pesë Yje (M5S), parlamentarët e së cilës i quajtën komentet e tij "tronditëse dhe të turpshme".

Në një deklaratë të përbashkët, anëtarët e M5S vunë në dukje se shefi i politikës së jashtme të BE-së Josep Borrell pohoi natyrën detyruese të vendimeve të Gjykatës Ndërkombëtare të Drejtësisë për vendet anëtare të BE-së. /AA