Komuna e Rahovecit e ka nderuar Prof. Dr. Sadri Bajraktarin me Dekoratën për Humanizëm “Dr. Ali Sokoli”.

Kryetari i kësaj komune Smajl Latifi tha se kjo dekoratë përfaqëson jo vetëm misionin e një mjeku, por edhe atë të një intelektuali dhe humanisti, i cili gjithë jetën ia kushtoi përmirësimit të mirëqenies së popullit shqiptar, e shembulli i Prof. Dr. Sadri Bajraktarit sipas tij është frymëzues dhe motivues.

Sot, në një ceremoni solemne dhe në prani të familjarëve, bashkëpunëtorëve dhe qytetarëve, nderuam Prof. Dr. Sadri Bajraktarin me Dekoratën për Humanizëm “Dr. Ali Sokoli”, i cili është një mjek e humanist i shquar, që rrjedh nga një derë e madhe e Anadrinisë, derë që ka nxjerrë shumë burra e njerëz të vyeshëm të fjalës, të dijes e të pushkës.

Dr. Ali Sokoli, bashkëvendësi ynë, ka qenë shëmbëlltyrë për të gjithë, prandaj edhe ia vumë emrin dekoratës për humanizëm. Në këtë mënyrë kemi dashur ta respektojmë e vlerësojmë misionin fisnik e human të mjekut, duke e zgjedhur një ndër emrat më emblematik të shëndetësisë në Kosovë. Ai nuk kishte pranuar të shkilte mbi nderin dhe dinjitetin e tij, nuk kishte pranuar ta përdhoste betimin e shenjtë të Hipokratit dhe nuk kishte pranuar ta vinte vulën e tradhtisë në biografinë e tij. Prandaj, shërbimi i fshehtë jugosllav e kishte zgjedhur mjetin më efikas për eliminimin e tij, vdekjen e shpejtë, gjoja si pasojë e sulmit në zemër.

Kontributi i madh i doktor Bajraktarit nuk mund të matet me vite, por me punën dhe përkushtimin që ai ka treguar ndaj njeriut dhe humanizmit.

Duke i institucionalizuar këta emra të shquar të historisë sonë, ne kontribuojmë për njerëzimin, sepse shembujt e vetëmohimit dhe sakrificës duhet të pasohen nga brezat që vijnë.