Mbrojtësi i Interit, Francesco Acerbi u dëgjua nga prokurorët e FIGC të premten, si pjesë e një hetimi mbi akuzat e bëra nga Juan Jesus i Napolit, pas një shkëmbimi fjalësh mes dy lojtarëve gjatë një takimi të Serie A midis dy palëve para pushimit ndërkombëtar.

Acerbi u akuzua nga Juan Jesus se kishte përdorur gjuhë raciste gjatë barazimit 1:1 mes Interit dhe Napolit në “Giuseppe Meazza” fundjavën e kaluar, raporton KosovaPress.

Që atëherë të dy lojtarët i kanë dhënë versionin e tyre të ngjarjeve prokurorit të FIGC, Giuseppe Chine, i cili pritet të japë verdiktin e tij në ditët e para të javës së ardhshme.

Acerbi u hoq nga skuadra e Kombëtares së Italisë përpara udhëtimit të ekipit në Shtetet e Bashkuara të Amerikës këtë javë, si pasojë e incidentit të dielën e kaluar.

Qendërmbrojtësi me përvojë ka qenë duke u stërvitur si zakonisht me pjesën tjetër të lojtarëve të Interit, të cilët nuk u thirrën për detyrën ndërkombëtare. Të premten, pas përfundimit të seancës së “Nerazzurrëve”, Acerbi kaloi mbi një orë në një konferencë me prokurorët e FIGC.

Sipas raporteve nga “Calciomercato.com” dhe “Il Corriere della Sera”, Acerbi pranoi se kishte përdorur fjalën “i zi”, por jo në një kuptim nënçmues.

Raportet e së shtunës sugjerojnë se FIGC nuk ka qenë në gjendje të gjejë prova audio të shkëmbimit të fjalëve midis Acerbit dhe Juan Jesus. Nëse qëndron rregulli i FIGC se Acerbi ka shkelur nenin 28 të kodit të drejtësisë sportive, ai mund të përballet me një pezullim prej rreth 10 ndeshjesh.