Ish-trajneri i Kombëtares së Kosovës Albert Bunjaki ka lavdëruar dhe hapat e shpejtë që ka bërë Kombëtarja Shqiptare në futboll, duke thënë se tashmë nuk mund të cilësohet si befasi kualifikimi i tyre në kampionate evropiane, derisa është shprehur i bindur se kuqezinjtë së shpejti do të jenë pjesë edhe të kampionateve botërore.

Duke folur për KosovaPress, Bunjaki ka thënë se suksesi i Shqipërisë ndikon pozitivisht edhe në zhvillimin e futbollit në Kosovës.

Duke folur për grupin e vështirë në të cilin ndodhet Shqipëria, Bunjaki tha se është tejet optimist që Shqipëria do të kalojë grupin, derisa ka shtuar se fituesi i këtij grupi do ta fitojë Kampionatin Evropiane.

“Italinë e shoh, lojën e parë e shoh shumë të mundshme të jetë barazim. Nuk e shoh Kroacinë atë Kroaci e cila ka qenë më herët, do të thotë është në ndërrimin e gjeneratave akoma, mirëpo mendoj që mund ta befasojë Kroacinë përderisa me Spanjën mendoj që do të jetë më e vështirë, mirëpo unë jam optimist që Shqipëria definitivisht mendoj që do ta nxjerrë një barazim dhe eventualisht edhe një fitore dhe një barazim tjetër. Mirëpo, mendoj që fituesi i grupit do të jetë edhe fituesi i Kampionatit Evropian. Definitivisht është grup mjaftë i vështirë”, theksoi Bunjaki.

Shqipëria e hap kampanjën e Euro 2024 me ndeshjen kundër Italisë që zhvillohet të shtunën me fillim nga ora 21:00.