Brirët e rinoqerontëve të të gjitha llojeve janë shkurtuar dhe ngushtuar gradualisht në njëqind vitet e fundit, dhe shkaku i kësaj është vetëm njeriu, domethënë gjuetia, kanë përcaktuar shkencëtarët.

Rinoqerontët ishin më parë një kapje trofesh, dhe që nga viti 2007, gjuetia e paligjshme ka qenë në rritje për shkak të përdorimit të brirëve të tyre në mjekësinë tradicionale aziatike.

Rezultatet e hulumtimit të ekspertëve nga Kembrixhi, të publikuara në revistën People And Nature, bazohen në analizat e fotografive të rinoqerontëve gjatë 140 vjetëve të fundit.

Shkencëtarët besojnë se gjuetia e shpeshtë e rinoqerontëve me brirë më të mëdhenj do të thotë se ata me brirë më pak mbresëlënës kanë mbijetuar dhe tani po ua kalojnë karakteristikat e tyre gjenetike gjeneratave të reja.

"Rinoqerontët janë ndoshta më të vështirët për t'u studiuar në historinë natyrore për arsye sigurie. Kjo është arsyeja pse ne jemi vërtet të emocionuar që mund të vërtetojmë përmes fotografive se brirët e tyre janë zvogëluar me kalimin e kohës", tha Oscar Wilson, autori kryesor i studimit.

“Rinoqerontët zhvilluan brirë për një arsye, disa specie për të marrë ushqim, të tjera për t'u mbrojtur nga grabitqarët, kështu që ne mendojmë se të jetuarit me brirë më të vegjël mund të dëmtojë mbijetesën e tyre”, shtoi ai.

Shkencëtarët matën brirët e 80 rinoqerontëve, të fotografuar nga viti 1886 deri  2018. Kishte pesë lloje rinoqerontësh, të bardhë, të zi, indian, java dhe sumatra.

Ata studiuan fotografitë e rinoqerontëve të vrarë nga gjuetarët pa leje, duke përfshirë fotografinë e famshme të vitit 1911 të ish-presidentit amerikan Theodore Roosevelt mbi një rinoqeront të zi që ai sapo kishte vrarë.

Shkencëtarët matën edhe pjesë të tjera të trupit të rinoqerontit, në mënyrë që gjatësia e bririt të matet me saktësi në proporcion me madhësinë e trupit.

Rinoqerontët janë një specie e rrezikuar. Sot ka rreth 30,000 prej tyre në natyrë, dhe në fillim të shekullit të 20-të kishte gjysmë milioni prej tyre. Dhe tre specie midis tyre – i zi, java dhe sumatra - janë në listën e specieve të rrezikuara.