Shoqata Çamëria ka mbajtur Kuvendin e IV-të zgjedhor, ku nga gjashtë kandidatë, kryetar i ri i kësaj shoqate është zgjedhur Besim Dinolli

Në fillim të këtij Kuvendi, kryetari i Shoqatës Patriotike “Çamëria“ në Kosovë, Nexhmi Muçiqi në mbledhjen e mbajtur në nderim të të rënëve të kohërave historike, tha së Çamëria i takon të gjithë shqiptarëve dhe jo vetëm një shoqate.

Muçiqi bëri thirrje dy institucioneve, Kosovës dhe Shqipërisë që të bashkëpunojnë dhe të udhëheqin në proceset e bashkimit.

Ai bëri thirrje edhe miqve ndërkombëtarë që kur të vënë drejtësinë në vend, të mos harrojnë edhe shqiptarët e Çamërisë, të cilëve nuk po iu lejohet që të kthehen në shtëpinë e tyre.

Ndërkaq, përfaqësuesja e Partisë për Drejtësi dhe Unitet, Lumturi Hasa derisa ka uruar Kosovën për pavarësinë e saj, tha se populli shqiptarë duhet të ndjehet borxhlinjë ndaj ish-luftëtarëve.

Ajo tha se padrejtësia më e madhe që i është bërë shqiptarëve, është ajo e Çamërisë.

Po ashtu, përfaqësues i Shoqatës "Çamëria”, për Maqedoni, Betim Mehmeti tha se të gjitha shoqatat duhet të bashkohen dhe  të punojnë për të arritur qëllimet e tyre për Çamërinë e bashkuar.

E më pas në Kuvendin zgjedhor, kryetar i ri i kësaj shoqate është zgjedhur Besim Dinolli. Ai para të pranishmëve tha se do të bashkëpunojë me të gjithë për çështjen çame.