FC Bayern do të përballet me Paris Saint-Germain në gjysmëfinalen e parë të Champions League në një situatë të pazakontë: pa trajnerin Vincent Kompany në stol.

Belgu është i pezulluar pas kartonit të verdhë dhe nuk lejohet të ketë kontakt me ekipin gjatë ndeshjes, duke ia lënë drejtimin ndihmësit të tij, Aaron Danks. Megjithëse vjen pas një fitoreje dramatike 4-3 ndaj Mainz, Bayern mbetet një nga favoritët kryesorë falë formës së shkëlqyer në Evropë, ku ka shënuar 11 fitore këtë sezon.

"Është një situatë e re, por ne do ta përballojmë këtë sfidë si ekip," u shpreh drejtori sportiv Christoph Freund, duke theksuar besimin te stafi teknik.

Për Aaron Danks, ky është momenti më i rëndësishëm i karrierës, duke marrë përgjegjësinë në "Parc des Princes".

Ndërkohë, në fushë vëmendja do të jetë te ylli i bavarezëve, Luis Díaz, i cili ka shënuar në tre ndeshje radhazi në Champions League dhe njihet për golat e tij vendimtarë në pjesët e dyta. Bayern vjen me një ecuri mbresëlënëse prej 19 ndeshjesh pa humbje, por përballë do të ketë një PSG që kërkon fitoren e 100-të në histori të këtij kompeticioni.

"Ekipi i Kompany-t është i sinkronizuar mirë me njëri-tjetrin," shtoi Freund, duke siguruar që mungesa e trajnerit në vijën e parë nuk do të ndikojë në disiplinën taktike të gjigantëve gjermanë.

KosovaPress