Ballkani u tregua skuadër më e mirë përballë Larne nga Irlanda e Veriut, duke krijuar raste të mira shënimi në “Fadil Vokrri” në Prishtinë, por pa konkretizuar golin e shumëkërkuar, duke përfunduar kështu me humbje ndeshjen e parë të rrethit të tretë të kualifikimeve për Ligën e Konferencës me rezultatin 0:1.

Suharekasit dominuan në pjesën e parë, ku Bernard Karrica kishte rastin më të mirë për shënim në minutën e 33-të, por portieri mysafir Rohan Ferguson intervenoi duke mos lejuar topin të përfundojë në rrjetën e tij.

Aksioni më i mirë për Ballkanin në pjesën e dytë ishte në minutën e 54-të kur Almir Kryeziu dhe Lindon Emërllahu rrezikuan më seriozisht portën kundërshtare, por në të dyja rastet nuk u treguan precizë, duke shpëtuar kështu skuadra mysafire pa pësuar gol.

Rast të volitshëm shënimi kishte edhe Walid Hamidi shtatë minuta më vonë, por nuk arriti të gjejë golin, pasi goditja e tij e përfundoi jashtë portës së Rohan Ferguson.

Almir Kryeziu kishte një rast të mirë shënimi në minutën 71, por goditja e tij përfundoi pranë portës kundërshtare. Dy minuta më vonë Walid Hamidi nga afërsia po ashtu kishte rast të mirë për të tundur  rrjetën kundërshtare, por në momentin vendimtar u ngatërrua dhe humbi topin.

Kur pritej përfundimi i ndeshjes pa fitues, mysafirët nga rasti i parë më serioz arritën të sigurojnë fitoren përmes golit të Aroon Sean Donelly, i cili u gjet më së miri para portës së Enea Koliqit në minutën e 90-të.

Në këtë mënyrë skuadra e Ilir Dajës kualifikimin për play-off do ta kërkojë në revanshin që do të zhvillohet pas një jave në “Inver Park” të skuadrës aktuale kampione të Irlandës Veriore, Larne.  

Ndryshe, këto dy skuadra janë përballur edhe vitin e kaluar në kualifikimet për Ligën e Konferencës, ku suharekasit u treguan bindshëm më të mirë duke fituar me rezultatin e përgjithshëm 7:1 – 4:1 si mysafirë dhe 3:0 si nikoqirë.