Agjencia e Ushqimit dhe Veterinës (AUV), në aksionin e inspektimeve në regjionin e Prizrenit ka mbyllur  pesë lokale “Fast Food” dhe ka iniciuar gjashtë kundërvajtjeje. AUV ka organizuar aksion kontrolli mbi lokalet e gastronomisë qe shërbejnë ushqime të shpejta “Fast Food”.

Sipas AUV në këtë aksion janë përfshirë komuna e Prizrenit dhe Malishevës.

“Nga 19 inspektimet në Prizren dhe 9 inspektimet në Malishevë janë mbyllur 5 lokale. Janë iniciuar 6 lëndë kundervajtëse. Në dy raste janë shqiptuar gjoba mandatorë. Po ashtu janë asgjësuar 4 kg mish produkte mishi, 33 kokrra vezë dhe 1 kg salcë (sosë). Aksionet do të vazhdojnë në gjithë territorin e vendit. Secili subjekt qe vendos ne treg produkte ushqimore në kundërshtim me rregullat ligjore do të sanksionohet. Ruajtja e shëndetit të qytetareve është prioritet dhe synim kryesor i AUV-së”, ka thënë zëdhënësi i AUV, Lamir Thaçi për KosovaPress.

Sipas Thaçit, përmes 6 ekipeve inspektuese të udhëhequra nga Koordinatori i zyrës regjionale të  AUV-së në Prizren. Është arritur të realizohen 28 inspektime të detajuara sipas urdhrit të Ministrit të MBPZHR-së dhe Drejtorit Ekzekutivë të AUV-së”, thuhet në njoftim.

Ndërsa, numri personave të helmuar dy ditë parë nga ushqimi në një lokal në Malishevë, është rritur në 205. Kështu ka bërë të ditur për KosovaPress, drejtori i Qendrës Kryesore të Mjekësisë Familjare në Malishevë, Afrim Krasniqi.

https://kosovapress.com/admin/numri-i-te-helmuarve-ne-malisheve-shkon-ne-205/