Arsim Bajrami i është kthyer plotësisht punës akademike, meqë pak ditë më parë hoqi dorë nga kandidatura për president të Kosovës.

Vendimin për të mos garuar, ai i tha KosovaPress-it se e mori në momentin kur, u bind se partitë politike nuk duan president unifikues dhe të pakontrollueshëm prej tyre.

“Në momentin kur partitë kryesore kanë hequr dorë nga një kandidat i unitetit, një kandidat me përvojë, atëherë unë e kam tërhequr kandidaturën sepse po shihet se liderët tanë politikë nuk janë të interesuar për ta zgjedhur një president kredibil, por më tepër një president të cilin do ta kontrollojnë dhe do ta shndërrojnë në një tejzgjatje të politikave ditore”, u shpreh ai.

Presidentja Vjosa Osmani e shpalli dekretin për shpërndarjen e Kuvendit të Kosovës një ditë pasi kuvendi dështoi ta zgjedh presidentin brenda afatit të 5 marsit. Gjykata Kushtetuese ka vendosur masë të përkohshme, më 9 mars deri më 31 mars ndaj këtij dekreti. Ky vendim ndalon çdo veprim të presidentes Osmani dhe të kuvendit derisa masa e përkohshme është në fuqi.

Kërkesa për vlerësimin e kushtetueshmërisë së dekretit të presidentes u dorëzua nga kryeministri Albin Kurti në emër të Qeverisë.

Lëvizja Vetëvendosje në seancën parlamentare të 5 marsit, paraqiti në momentin e fundit kandidaturën edhe të Fatmire Mulhaxha Kollçakut, si kundërkandidate të Glauk Konjufcës për president. Në mungesë të opozitës nuk pati kuorum për të votuar. /Sh.Pajaziti